是咁的，話說直到明治時代為止，日本新年其實都係跟舊曆嘅，不過隨著日本政府於明治6年轉用西曆，新年就由農曆初一轉到西曆嘅1月1號。
時至今日，農曆新年雖然仲有個名留喺度（稱作「旧正月」)，但已經不再受到重視（同時亦無假放），對現代嘅日本人黎講，新年可以話只等於西曆1月1號。
話雖如此，重視保留傳統文化嘅西日本，仍然會有神社喺「旧正月」搞下祭典咁。
例如島根縣嘅出雲大社就會喺農曆年三十晚至年初一舉行「福神祭」，神社大殿會開放俾一般人士入內參拜，同場仲會搞大抽獎，頭獎係純金嘅「大國主大神」神像一座，真係聽到都想去試下手氣！可惜因為武漢肺炎關係，官方宣布今年「福神祭」嘅相關活動都會取消，純金神像要到下年先有得再抽啦！
（圖片來源：出雲大社官方網站：https://izumooyashiro.or.jp）
而相隔一大個海嘅沖繩，到而家都仲有好好保留「旧正月」呢個節日（雖然都係無假放），居民唔只會拜神，仲會食下新年料理咁。喺最南邊嘅糸満漁港，漁船仲會棟起「大漁旗」，祈求黎緊一年順風順水，係當地嘅一個習俗。
話說回來，不論文化定係社會狀況，沖繩好多時都同日本其他地方大相徑庭，甚至有日本人覺得「沖繩唔係日本」，呢個我哋日後有機會再詳談。
（圖片來源：糸満市官方網站：http://www.city.itoman.lg.jp/index.html）
最後，講到農曆新年當然唔少得中華街。日本有所謂「三大中華街」，分別位於橫濱、神戶，同埋長崎。呢啲中華街當然都會慶祝農曆新年，不過可能由於係內地人做主導，所以佢哋慶祝嘅，叫做春節。詳細就唔花口水講啦，都係你同我知嘅嗰啲啦！
（圖片來源：橫濱市官方網站：https://www.welcome.city.yokohama.jp/）
就算居於唔太重視農曆新年嘅日本，相信唔少在日港人都會心郁郁想同親朋戚友喺新正頭聚下，不過本會都要提醒大家，多個都府縣仍處於緊急事態宣言當中，大家可能都係毒留在家安全啲。
而喺香港嘅各位就更加要萬事小心，包括而不僅限於肺炎。
最後恭祝各位龍馬精神，心想事成！
日本香港人協會編輯部