最近有個香港朋友識咗一位姓御手洗嘅日本人，呢位朋友日文都有N2程度，當然知道「御手洗」（おてあらい）係日文「廁所」咁解，即係點？要下下叫個日本朋友做「廁所先生」？會唔會好似侮辱緊佢咁？
一問之下，先發現呢個日本朋友嘅姓寫就寫做「御手洗」，但係讀做「みたらい」，係指拜神前洗手同漱口嗰個位，而唔係指廁所。如果一開始唔為意叫咗對方做「廁所先生」，咁就真係得罪人。
（圖片來源：朝日新聞）
其實除咗御手洗，日本仲有好多「唔係照字面咁讀」嘅姓。例如「月見里」，讀做「やまなし」，意思係「無山」，因為條村附近無山，所以就睇到個月亮咁。又例如近年動漫界成日見到嘅「小鳥遊」，讀做「たかなし」，意思係「無鷹」，因為無鷹，所以啲小鳥就可以出黎玩咁解。
睇返日本歷史，古代日本人本來係有名無姓嘅，只有支配某啲地域嘅豪族會俾天皇賜姓，用以分辨呢啲豪族嘅根據地或者工作性質。所以唔好話平民，連賜姓俾人嘅天皇本身都係有名無姓。
明治維新之後，新政府為咗容易啲管理戶籍，先頒布「平民名字許可令」，俾一般人可以自己改返個姓俾自己。不過改姓等於登記戶籍，登記戶籍又等於要交稅同當兵，所以當時好多人都索性唔改，跟返以前有名無姓就算。直到後黎政府再頒布「名字必称義務令」，日本民眾先至被迫一定要自己改返個姓。（只限平民，天皇依然唔駛改）
（圖片來源：ＮＯＷ新聞）
由於啲姓係由古時候嘅天皇，或者明治時代嘅民眾自己任改，讀音亦唔一定要跟返原本漢字嘅讀音，所以就有唔少姓好似上面啲例子咁，啲字同個讀音唔一樣，對外國人黎講真係識睇唔識讀。
所以呢，唔理你日文有幾好，下次識到新嘅日本朋友，記得第一件事問清楚佢個名點讀先呀！
日本香港人協會編輯部