前排喺條街度好似成日見到有女仔著和服，唔通好似著和服去睇煙花咁，佢哋係著和服去賞櫻？其實唔係。
話說日本嘅學期係由每年嘅４月開始到翌年嘅３月，所以３月尾係日本學校舉行畢業禮嘅時期。
穿著「袴」出席正式場合（如畢業典禮、成人禮、婚禮等），係日本傳統嘅一種。所以前排著和服嘅女仔，相信大部份都係出席畢業典禮嘅學生。
講到呢度，相信好多朋友都會問：咩係「袴」？
「袴」同香港人熟悉嘅「浴衣」都係和服嘅一種，佢哋嘅關係如下圖：
雖然都係和服嘅一種，個樣又好鬼似，但「袴」同「浴衣」其實有著好大嘅分別。
1. 構造
相比「浴衣」嘅一件過，「袴」係分成上下兩部份。上面嘅部份同普通和服相差無幾，而下半身就會另外著一件和式嘅長裙或闊褲，「袴」呢個字本身就係指下半身穿著嘅部份。話說明治時代女性教育開始普及，但著舊有傳統和服上堂，坐一坐就皺，所以下半身另外著無咁易皺嘅「袴」就慢慢成為主流。
上圖左為「袴」，右為「浴衣」。睇得出「袴」係明顯分為上下兩截，「浴衣」就一件過，中間用條帶扎住。
（圖片來自樂天市場）
2. 穿著季節及場合
「浴衣」因為物料單薄，冬天著會凍死，所以基本上係夏天限定。加上係一件過，俾人感覺相當casual，睇煙花呀去祭典呀，你想著就可以著，不過喺正式場合著就會顯得非常唔禮貌。相反「袴」係會幾件衣物疊著咁著，喺夏天著要有熱死嘅覺悟，同時造型上比較高級同豪華，主要用黎出席正式場合，平日著黎同朋友出街係會嚇死親佢哋。
3. 價錢
「袴」嘅高級唔單止在於造型上，同時亦反映喺價錢上。因應物料同設計，「袴」嘅價錢變動相當大，高級啲嘅基本上係天價，最平價嘅一set都要一萬日圓以上。而著得「袴」嘅都係隆重場合，你係唔會想著一套人人都睇得出係平價嘢嘅平價嘢，所以「袴」嘅出租服務喺日本非常受歡，尤其係畢業季節，唔想租啲「餸頭餸尾」，就要２至３個月前book定。一set見得下人嘅，４日３夜大概２萬日圓左右。至於「浴衣」呢？臨到夏天，各大百貨公司及連鎖服裝店有售，平平哋嘅話５千日圓樓下，成set連木屐，即買即著都仲得。
雖然好似講黎講去都係講緊女裝咁，但其實「袴」都有男裝，不過現代男性出席正式場合一般都流行著西裝，令男裝嘅「袴」喺街上變得少見。不過老實講，其實男裝「袴」真心型，鍾意日本文化而又仲讀緊書嘅同學仔，不妨考慮下。
日本香港人協會編輯部