喺香港講起「黃金週」，相信好多人都會諗起鄰國嘅「十一黃金週」，但喺日本講「黃金週」，日本人get到嘅會係4月尾至5月初嘅大型連休。咁其實日本黃金週係一個咩假期黎呢？
嚴格黎講，佢唔係一個假期，而係四個假期，分別係：4月29日「昭和之日」、5月3日「憲法記念日」、5月4日「綠之日」同埋5月5日「兒童之日」。而其中嘅「昭和之日」同埋「綠之日」其實有段故：
「綠之日」
話說4月29日係昭和天皇壽辰，原本係叫做「天皇誕生日」嘅假期。後來昭和天皇駕崩，平成天皇繼位，「天皇誕生日」順理成章變成平成天皇壽辰嘅12月23日。咁4月29日點算？
不如取消……唔得！「為了生活我可以忍，但冇咗公眾假期就不行！」……日本政府就無咁講嘅，不過大家都習慣咗4月29日放假，加上公眾假期都有刺激消費嘅作用，所以政府攪盡腦汁，諗咗「綠之日」呢個名目，保留住4月29日嘅假期。官方說法係：「因為昭和天皇係個植物學者，對植物好有研究，所以用『綠之日』黎記念佢。」
嗯……可能有人會覺得牽強，但算啦，公眾假期誰不愛？話說回來，有一個拚命保留一日公眾假期嘅政府，真係令香港人又羨慕又妒忌。
（圖片來自日本宮內廳）
「昭和之日」
後黎去到2007年，日本修訂咗「祝日法」，法例訂明「如果公眾假期同公眾假期之間夾咗一日平日嘅話，嗰日都要變埋公眾假期。」
睇黎鍾意放假嘅唔只行政機關，連立法機關都……豈有此理！實在令人太羨慕啦！！
而依法辦事嘅政府，就要喺5月3日「憲法記念日」同埋5月5日「兒童之日」之間，諗辦法整多日假期。就喺呢個時候，有人提出：「其實唔只昭和天皇，昭和年代作為一個動盪嘅年代，都好值得記念丫！不如咁，『綠之日』就改返叫『昭和之日』啦！」
「咁『綠之日』呢？取消咗佢？」
「no, no, no……我哋受大自然咁多恩惠，喺5月3日立一個「綠之日」黎感謝返個大自然，係合情、合理、合法嘅事黎！」
呢個諗法實在係太偉大啦！如是者，「綠之日」就變咗做5月4日，而原本4月29日嘅「綠之日」就改咗名做「昭和之日」，我哋熟悉嘅大型連休「黃金週」正式誕生。計埋星期六、日，如果嗰年好彩，又或者自己主動用下啲annual leave，可以連放十幾日假都不是夢！
真係可喜可賀！可喜可賀！
日本香港人協會編輯部