香港曾經係世上所餘無幾，可以合法、公然咁悼念六四事件死難者嘅華人社會，但隨著國家安全法推行，香港嘅六四悼念活動恐怕唔會再咁容易舉行到。
每年嘅六四悼念，彷彿已成為香港人嘅生活習慣之一。6月4日前嘅週末會有遊行，六四當晚在維園會有燭光晚會，每年民主派嘅政治人物都會上台嗌下口號，民眾喺台下會拎著蠟燭，一齊默哀，又會唱下《民主會戰勝歸來》《自由花》呀咁，恆例到有啲老套，而又因為每年都會搞，就算去開嘅有時都會覺得「有其他緊要嘢，唔去一年，咪下年再去囉」。
六四悼念活動可以話係香港文化空氣中嘅一部份。空氣嘛……我哋平日呼吸開，唔會特別諗要唔要珍惜，亦唔會花心思諗要點樣裝著佢，等自己聽日仲有得吸。不過，今後一切大概會變得同以往愈黎愈唔一樣，我哋覺得理所當然嘅嘢，會慢慢變得唔再理所當然；我哋覺得「唔會嘅，點會丫」嘅嘢，亦好有可能會逐一發生。
執筆之時，正值2021年6月4日，香港警察禁止燭光晚會舉行，動用咗7000警力，封鎖維園，甚至禁止途人於街上拎著蠟燭進行悼念。原來，默哀係可以禁止，悼念都可以係犯法。
今日被禁嘅係六四晚會，聽日被禁嘅又會係乜嘢？講廣東話？拜黃大仙？我哋唔知。我哋只知道，守護同保存香港嘅空氣，會係我哋呢一代人嘅責任。
日本香港人協會