唔經唔覺今年已經過左一半，日本又就嚟到七夕「たなばた」啦。
七夕讀法有兩種，一係和語讀法嘅「たなばた」，一係漢語讀法「しちせき」。
咁點解唔叫しちせき而係たなばた？首先要講講日本七夕係點嚟嘅先。
起源嘅講法有3種：
1. 改編至牛郎織女故事「織姫と彦星」（おりひめとひこぼし）
其實故事內容都幾似，不過由感情好轉左做結咗婚但感情麻麻，天帝直接叫佢哋係銀河兩邊分居，淨係比每年嘅7月7號見一次。
得唔到係好啲嘅，距離產生美，咁咪好返囉。
2. 古代中國嘅習俗「乞巧奠」（きっこうてん）
7月7號對住織姫星祈求自己紡織手藝進步。慢慢就唔單止祈求有關紡織嘅技能，亦都會祈求書道（尤其係男性）及其他手工藝有所長進。
3. 古日本嘅習俗「棚機」（たなばた）
為左求神明保佑秋天穀物豐收， 古代日本會揀啲少女（はなばたつめ）係清澈水源邊嘅屋仔（はたや）到織和服比神明，織野用個部織布機就叫「たなばた」。所以依家多數都將七夕讀做「たなばた」。
習俗及慶祝方法
日本多數會係新曆7月7日慶祝，不過唔同地區慶祝時間唔同。歷史耐啲，全日本最盛大嘅七夕祭ー仙台七夕まつり ，就跟返傳統舊曆，係新曆8月6-8號搞，每年多達200萬人參加。
祭典之外，日本人仲會寫自己嘅願望係紙仔（短冊）掛係棵竹上面。短冊顏色有黑白藍紅黃五色 （藍色有時會用綠色代替，黑色用紫色代替），對應陰陽五行嘅「金木水火土」。舊時寫喺短冊嘅願望通常都係希望自己手字寫得靚啲，家下寫咩願望都可以。
除此之外仲會掛其他裝飾，例如紙鶴（喻意長壽），網飾り （喻意漁獲豐收）。
食物方面，古時中國會係七夕做「索餅」供奉神明，傳到日本最似嘅食物就係素麵。素麵亦都令人聯想到織姫嘅絲綢，於是依家就變成左七夕嘅代表食物啦。
講到尾日本七夕同香港七夕有咩分別，答案好簡單。
日本七夕唔關愛情事，人哋pure好多㗎！
不過作為一個A0，心底個句就梗係諗唔知我幾時先可以借七夕個名同仔仔着浴衣行祭典，睇煙花啦！
#這些機會不是我的
#冇咩事我返去開返部流水素麵機先
#一人素麵都可以好開心架
日本香港人協會 A0小編