又到農曆7月，相信每個有車站嘅地方，就有車站嘅都市傳說。香港有3條路軌嘅彩虹站，消失嘅林士站，屈地站。而講到日本嘅車站都市傳說，一定要提「如月車站」（「きさらぎ駅」）。
如月車站嘅傳說係2004年由2channel（日本好出名嘅文字討論版）度出現嘅實況po開始。當時有個網友話自己係新濱松站上車，列車駛了一段長時間都冇到站，車箱氣氛古怪，之後列車停左係「如月車站」。
停站唔奇怪，最奇怪係日本咁多個站，冇一個站叫「如月車站」。車站度乜都冇，站牌亦冇寫上個站同下個站係乜，站附近淨係見到山同草原（啫係同人講你附近係便利店一樣，冇特徵冇人知），GPS又出現error。位網友就決定沿住路軌行返去，點知中途聽到太鼓同鈴聲，又見到個冇左隻腳嘅阿伯突然出現又突然消失，都咪話唔驚。唔知好彩定唔好彩，穿過條隧道後，見到有車主話肯送自己到附近車站（溫馨提示返大家：唔好隨便上陌生人車），之後佢就冇再出文，音訊全無。
到2011年位網友再出現，話發生左好多嘢之後佢就直接嚟到2011年，中間空白左7年。到依家都冇人知「如月車站」到底喺邊。
之後陸陸續續都有人話自己都試過去到「如月車站」，又有人話靠燒自己本notebook出煙返翻嚟現實世界。不過由於成件事都淨係網絡上傳播，最初位網友講嘅嘢又有啲矛盾，真假都冇辦法查證。
不過香港咁方便，唔搭港鐵咪搭巴士囉，最緊要嘅係，更恐怖嘅我地都經歷過啦。唔信？你諗下你上次去旅行係幾時，以為係靚仔靚女嘅除咗口罩係咩樣，去地產鋪到睇下樓價幾高。更重要嘅係每年拜年，親戚都會問嘅拍拖未結婚未。
你話啦，到底邊樣恐怖啲？