2020東京奧運延期一年，終於喺上個月尾順利開幕。開幕典禮喺國立競技場舉行，坊間對今次開幕禮評價不一，連籌備過程本身都係花生不斷，但有一part表演幾乎獲得一致好評——《扮嘢大挑戰》式嘅競技項目pictogram表演。
《日本扮嘢大挑戰》原名《欽ちゃん&香取慎吾の全日本仮装大賞》，係日本嘅老牌扮嘢搞笑節目，80年代由TVB引進香港，初期譯做《日本扮嘢大挑戰》，2014年起改譯為《瀛真扮嘢王》，不過變古天樂話齋：「TVB就唔講啦。」對個節目有興趣嘅自己Google啦。
今日想同大家講嘅重點係：pictogram。
「Pictogram」，即係所謂嘅圖示，平日大家喺公廁前面見到嘅男、女廁公仔，就係pictogram嘅一種。用pictogram嚟表示各種設施同埋奧運項目，喺現代社會嚟講，就好似汽車維修員會隨身帶著士巴拿一樣咁理所當然。不過正如國家領土一樣，人世間無嘢係自古以嚟就存在嘅，pictogram都唔例外。而你又有冇諗過，唔單止奧運，連平時日日喺商場見到嘅pictogram，其實都係made in Japan？
(圖片來自2020東奧youtube頻道）
時間回塑到1964年，即係上一次嘅東京奧運。話說1964年之前嘅奧運會全部都集中喺歐美國家舉行，喺亞洲舉辦奧運係歷史上首次。作為主辦國，當時日本面臨一個極度令人頭痛嘅難題：言語不通。
當時國際奧委會嘅法定語言係法文同英文，對一般日本人嚟講法文就當然唔會識，英文大家亦都唔擅長。但掉返轉頭，嚟自外國嘅奧運選手同遊客又絕大部份都唔識日文。當時嘅日本有兩個選擇，一：所有宣傳同指示牌都寫晒法、英、日三種語言；二：諗條新橋。
當時嘅東奧美術總監——勝見勝就揀咗後者。佢從日本傳統嘅「家紋」得到靈感，諗到用紋章嘅形式嚟表達啲運動項目同埋基礎設施。
最後日本嘅設計團隊完成咗數十個pictogram，除咗由設計師山下芳郎負責嘅競技項目pictogram外，仲有由11個年輕設計師設計嘅基礎設施pictogram，當中唔少後來被全世界廣泛使用。而家常見嘅男、女廁pictogram就係其中之一，女廁公仔嘅形狀係參考自當年英國時裝設計師Mary Quant嘅迷你裙，可謂走在1964年嘅潮流尖端。
（圖片來源：https://item.rakuten.co.jp/saltbox/c/0000000135/）
時至今日，日本制定咗名為「JIS規格」（日本工業規格）嘅標準，以統一日本國內使用嘅pictogram。標準包含咗約110款「於日本國內被理解及使用」嘅pictogram，廣泛應用於道路標示及公共設施。而為迎接2020年東京奧運，日本當局於2017年對7種pictogram嘅JIS規格作出修改，其中「溫泉」pictogram嘅改變，喺日本就引嚟唔少爭議。
上圖左邊為舊款嘅溫泉pictogram，右邊為新款。官方表示，舊嘅溫泉pictogram成日比外國人（包括香港人）誤會係熱茶呀、拉麵呀之類，所以喺個圈入面加返一家大細，等大家易明啲。但另一方面，唔少日本人就覺得舊版用咗咁多年，個pictogram本身已經算係日本近代文化嘅一部份，所以對呢個改變都頗有微言。
不過唔緊要，日本話晒都係一個民主國家，政府並無好似啲獨裁政權咁漠視民意，一意孤行。官方最後決定將新、舊兩款溫泉pictogram都納入標準，大家鍾意用邊款就用邊款。打和，super！
噢sorry，啱啱先講完唔講TVB。
完！