對日本演藝界有啲認識嘅都應該有聽過J家。J家個J係Johnny’s嘅頭文字，Johnny’s即係傑尼斯事務所（ジャニーズ事務所）。木村拓哉大家應該都識，佢就係J家旗下藝人之一啦！
對上個月，傑尼斯事務所外號「女帝」嘅瑪麗·喜多川（メリー 喜多川）因為肺炎過身，終年93歲。講明Johnny’s，社長就梗係叫Johnny（fans之間愛稱喜爺） 啦。咁瑪麗係邊個？佢係Johnny個家姐，實際營運嘅第一把交椅。呢兩姐弟一手打造出J家呢個娛樂帝國，就等我哋回顧下瑪麗嘅各種傳聞啦。
比起喜爺嘅平易近人，女帝就手段勁得多啦。近藤真彦出名深受女帝愛錫，近藤真彦同中森明菜著名嘅「金屏風事件」就有女帝嘅推波助瀾。仲有聽聞木村拓哉當年同工藤靜香結婚嗰陣，SMAP嘅經理人飯島三智唔同意，工藤靜香就直接搵左女帝傾掂數。所以木村先會到依家都留係J家冇走。
真正令女帝咁出名嘅，係同飯島三智嘅派系鬥爭，最後導致SMAP解散呢單嘢。話說女帝本身有個女，照道理下任社長應該就係佢。但那邊廂，飯島三智不走尋常路，叫偶像上綜藝，一手捧紅SMAP，之後帶嘅個個成績都唔錯，超班嘅業績直接威脅到太子女嘅地位。女帝想留個帝國比個女，就同飯島各種明争暗鬥，例如係受死對頭「週刊文春」受訪個陣對飯島單單打打咁。最後2016年飯島辭職，SMAP其中3個跟住走，派系鬥爭先告一段落。
不過以上有幾多係真，幾多係假，都好難考究。只可以話咁多年嚟，如果冇女帝，J家就唔會發展得咁勁。隨住喜爺女帝陸續過身，意味住J家一個時代嘅結束。11月V6迎嚟活動結束，同時新團なにわ男子出道。J家未來嘅發展如何就等我哋拭目以待啦。
*最後私心比大家聽下V6最近嘅歌，真係有集大成嘅feel！咁多年黎辛苦晒啦，希望佢哋未來繼續一片光明啦！
同埋大家記得訂なにわ男子出道CD「初心LOVE」呀！代班仔多謝定大家支持先！