日本香港人協會嘅第二次實體面對面活動，喺2021年11月27日THE BBQ BEACH in TOYOSU順利舉行『秋季港式BBQ』。
今次活動共有約40位參加者，除咗住係日本嘅香港人外，亦有好鍾意香港同曾經居住於香港嘅日本人參加。
為咗令各位回味喺香港大家熟悉嘅BBQ，我地特登喺香港運咗啲港式燒烤叉過黎，亦都準備咗牛油金菇、棉花糖、燒烤蜜糖等等港式BBQ絕不可少嘅食材，令到我地喺日本BBQ場入面顯得別具一格。
大家一邊享用美食，一邊「圍爐取暖」，互相分享在日生活見聞，訴說昔日喺香港生活嘅時光。活動完結時更有不少參加者交換聯絡，為今次嘅活動劃上圓滿句號。
日本香港人協會將會繼續舉辦不同活動，聯繫各位日本香港人。