香港滿18歲即成年，日本一般嚟講要滿20歲先成年（得天皇，皇太子，皇太孫先喺根據皇室典範成人年齡為18歲）今年1月10日喺成人之日，咁你又知唔知成人之日係點嚟嘅呢？
日本而家嘅成年禮參加者（新成人）喺只有上一年4月1號到舉辦當年3月31號出世嘅人。成年禮源自第二次世界大戰完咗冇耐嘅1946年（昭和21年）11月22號喺埼玉縣北足立郡蕨町（依家嘅蕨市）舉行「青年祭」。當時日本啱啱輸咗二戰，為咗鼓勵下一代要保持正面樂觀，心懷希望，埼玉縣蕨町青年團長高橋庄次郎（之後嘅蕨市長）就提議喺蕨第一國民学校（現：蕨市立蕨北小学校）嘅校庭搭帳篷、以青年祭之名舉辦成年禮。
來源: 蕨市官方網站
慢慢呢個儀式蔓延到全國，變成而家嘅成年禮。雖然根據2018年左右嘅調查名古屋市、同宮崎縣東臼杵郡諸塚村都話自己喺成年禮嘅發祥地。但早喺1979年（昭和54年）成人之日制定30周年嗰陣蕨市入面嘅蕨城址公園已經起咗個成年禮發祥地記念碑。
受「青年祭」嘅影響，日本政府喺兩年後1948年（昭和23年）公佈同實施祝日法律，以「為有成年人嘅自覺，堅毅不撓咁生活嘅年輕人獻上祝福」為主旨，翌年1949年（昭和24年）起1月15日就被定為成人之日。從此之後，多數地方嘅成年禮都會喺當日舉辦。1998年（平成10年）隨住祝日法修訂，2000年（平成12年）起，成人之日由1月15日改為每年1月第2個星期一。
小知識：成年禮女仔着嘅和服叫「振袖」，一般價格都非常昂貴，有啲家族仲會代代相傳㖭。（小編聽過有個日本朋友個套係佢阿婆幫佢阿媽訂製，再傳比佢，價值100萬⋯）
不過一世人得一次，開心最緊要～