來認識日本大學公開試 點解日本人考試要食吉列豬扒飯？！

香港學生以前要考入本地大學喺非常之困難，首先要報考CE「中學會考」、成績符合最低要求喺兩年後再報考A-Level「高級程度會考」，分數達到各院校收生要求嘅話，先可以升讀本地大學。而因為學位比較少嘅關係，成績唔太理想嘅考生都未必入讀心儀嘅學科！而因應三三四高中教育制度改革，喺2012年轉新制度後，考生只需要報考DSE就可以選擇升讀本地或海外大學。

而喺日本，由1990年開始, 大學嘅入學試由大學考試(入試)中心執行，喺每年1月13號之後嘅第一個星期六、日舉行。前身喺「國公立大學共同第1次學力測驗」、後尾改稱為「大學共同第1次學力測驗」，現為當前嘅名稱。考試均為選擇題，用塗卡嘅方式進行。2020年1月實施最後一次考試之後，2021年首度以「大學入學共同測驗」取代大學入試中心嘅測驗。雖然出題嘅方式維持不變，但題目類型會比過往更重視思考同判斷力。測驗科目有英文、數學、理科、歴史、國語、外語等，外語部分學生可以自由選擇，有法文、德文、中文、韓文等等。順帶一提，共同測驗嘅平均分數已經喺琴日2月7號公佈咗啦。

而一到考試季節，參拜神社果陣唔難發現周圍都會掛住莘莘學子祈求金榜題名而寫嘅繪馬。而超市亦會出現大量吉列豬扒飯。點解日本人考試前要食吉列豬扒飯嘅呢?

吉列豬扒飯（カツ丼）個「吉列」（カツ）發音同「勝利」（勝つ）嘅日文同音，所以吉列豬扒飯又叫做「勝利丼」。日本人會喺考試前食一碗，深信食完會帶嚟好運! 

而除咗去神社祈求考試合格、買護身符、同食吉列豬扒飯之外！仲有零食都有祈求合格嘅意思㗎! 

①KitKat：發音(キットカット) 同日文一定勝利(きっと勝つ）相似，甚至有人會將佢當做護身符帶入考場。

②樂天熊仔餅：樹熊因為一年四季都喺樹上生活，即使瞓著咗都唔會掉落嚟，所以有「唔會落榜」嘅意思。每逢考試季節，日本仲會推出唔同版本嘅熊仔餅，例如: 「達磨裝(不倒翁)」，代表心想事成、考試合格。

③POCKY：發音(ポッキー) 倒轉讀同日文キッポー「吉報」相似，亦有「捷報」嘅意思，發音聽起上嚟令人覺得有好意頭，所以喺日本一直都深受考生歡迎。