講到出名鐘意貓嘅民族，可能你會聯想到當貓係神咁拜嘅古埃及人。 但去到近年就不得不提大和民族對呢種可愛生物嘅熱愛程度啦。
根據日本寵物食品協會（東京） 2021嘅調查，估算日本人飼養嘅貓隻數量已經達到約895萬隻，數量已經係連續第四年超越飼養狗狗嘅數量。日本人嘅生活入面的確不乏貓星人嘅蹤影，有卡通人物、電車貓站長、貓Cafe、貓島、大文豪筆下嘅主角，甚至有專門供奉貓嘅神社。而且仲將今日（2月22號）定為日本嘅貓之日（猫の日）。
咁貓之日又係點嚟嘅呢？ 原來呢一日係喺1987年由一班愛貓嘅有識之士所創立嘅「貓之日執行委員會」連同日本寵物食品協會一同訂立，目的係為咗感謝人類同貓咪和平幸福咁一齊生活。而揀選2月22日係因為日文「222 」嘅發音同貓叫聲十分相似（ニャン・ニャン・ニャン）。而今年2022年2月22日當中有六吓「貓叫聲」，所以仲被稱為超級貓日（スーパー猫の日）添！
唔少日本嘅商舖、品牌都會襯貓之日推出各種各樣同貓咪有關嘅商品或者優惠提高銷量。而百貨公司同網店都會推出限時優惠，吸引一眾貓奴購買一系列可愛嘅貓咪商品同埋幫主子入貨。除此之外，各地區重會有貓咪攝影展、藝術展同埋祭典等活動俾大家參加。而大家慶祝活動當然唔少得幫一眾主子打卡再upload上Social Media，加返個hashtag #猫の日 等全世界都可以欣賞吓佢地啦。
來源：All Hearts Mall
來源：ねこ休み展
唔單只民眾會參與，甚至乎連知名企業都會舉辦特別活動。例如今年就有電視台BS テレ東（BS東視）將會喺今年貓之日限定改名為 BSキャッ東 （BS Cat 東） 一日， 當日仲會有貓社長為大家播放特備節目添！ 鐘意貓星人嘅各位記得唔好錯過呢一日啦！
來源：BS東視
疫情之下大家留喺屋企嘅時間多咗，難免會成日覺得空虛寂寞凍，見到咁多可愛嘅貓貓真係想養返隻嚟攬吓治癒吓心靈。但要記住：養寵物係一生一世嘅承諾嚟架，要諗清楚自己有無能力同耐心先好養呀！
參考資料