喺日本時不時都發生地震，如果屋企有危險，要去到外面避難嘅時候，應該去邊度好呢？
根據災害嘅情況，日本將避難場所分為幾類型:
臨時避難場所
當發生地震嘅時候，首先，去屋企附近嘅防災公園或者學校等等嘅空地臨時避難，評估確認災害嘅情況之後，再按指示做下一步行動。臨時避難場所有時候喺會根據地區嘅街坊會去決定。
指定緊急避難所
發生災害之後，如果確認唔到災害危險喺咪已經解除（例如擔心海嘯、餘震等等），可以去指定緊急避難所，並留喺到避難，等待災害危險解除嘅消息。
廣域避難場所
如果臨時避難場所有危險，或者去唔到嘅時候，就需要去更加大嘅公園或者廣場集合。而廣域避難場所嘅地點就喺由市區町村指定。
海嘯、水浸避難建築物
當河川氾濫或者發生海嘯嘅時候，一定要去有三層樓以上高度並且結構堅固嘅建築物避難。
災害時避難所
如果自己屋企不幸倒塌左而無家可歸嘅時候，可到此短暫避難生活。通常，由市區町村指定該區嘅小學同中學嘅體育館等作為避難場所。
福祉避難所
為高齡人士同埋殘疾人士所設嘅特殊避難場所。
唔知自己屋企附近嘅避難場所喺邊咁點算呢？東京有製作「東京都防災地圖」，可以喺網上了解各市區町村嘅避難場所。
亦可以喺網上搜索”市區町村名避難場”字眼，就會出現各自治團體製成嘅避難場所一覽表。 以防萬一，一定要預先查吓自己住果區嘅避難場所。
另外，日本國土交通省公布嘅「自然災害預測地圖」（日文叫做「ハザードマップ」），係依照每個地區詳細地形特徵資訊而繪製嘅防災地圖。如果想深入了解吓自己住果區有咩災害預測，例如洪水、海嘯、土石流、地震等等，可以去以下網站睇睇！
同埋根據各市區町村製作嘅防災網頁同小冊子，都會寫明「住喺乜乜町 乜丁目 乜番地至乜番地嘅人士請到 乜乜小學避難」。 所以，對於地區名、學校名、公園名以及其地理位置唔熟悉嘅話就未必第一時間知道喺邊。 同時，雖然有標明地圖，但就咁靠睇GOOGLE地圖喺未必知道實際街道情況（好似行走距離、街道闊窄、避難處所喺點樣等等）。
所以建議大家喺發生災害前，一定要去一去自己住果區嘅避難場所，實際睇一睇。同埋，平時要掌握清楚周圍地區名、學校名、公園名及其位置。萬一發生起災害上黎，都即刻知道避難場所喺邊，並喺災害發生後以安全嘅方式去避難場所。避難時如果有時間，最好穿著保暖並且好行嘅鞋。避免一個人行動，可能嘅話同屋企人、朋友、鄰居一齊行動。