「ランドセルの日」—日本小學生書包之日

升上小學，踏入人生新階段，通常都會懷住既興奮又緊張嘅心情迎接校園生活。買新書、新文具、新校服，當然唔少得買一個新嘅書包！

可能大多數香港小學生嘅第一個書包都係屋企人揀嘅淨色護脊書包，又或者係印有自己鍾意嘅卡通人物書包。而去到小四、五左右，第一個書包開始變得爛溶溶，加上自覺已經「大個仔大個女」，當然就想自己揀返個最潮嘅書包（90後的話應該以 Super-X 圓桶袋、Crazy Room等最為經典）。

如果有睇過《櫻桃小丸子》或者《叮噹》（a.k.a.多啦A夢）就會見到大部份日本小學生用嘅書包都係一式一樣：一款附帶雙肩帶、正正方方，常見有黑色、紅色為主嘅書包。

呢款書包日文叫做「ランドセル」（randoseru）。「ランドセル」一詞係嚟自荷蘭嘅外來語，原文為「Ransel」。呢種書包通常用皮革製成，雖然比一般書包重但卻非常耐用。所以日本小學生通常都會一個書包孭足整個小學生涯，唔似香港嘅小學生咁會換書包。

呢一款日本出名嘅書包當然都有一個屬於佢嘅節日啦。「ランドセルの日」係由増田利正等幾位皮革工匠所創立，定立於每年嘅3月21日 。選擇呢日除咗因為正值日本畢業季節之外，將日期中嘅數字 3、 2、1相加就會等於小學嘅學習年期6年，因此ランドセルの日仲有感恩有呢六年，同向裝滿呢六年回憶嘅書包表示感謝嘅意思。

重記唔記得自己嘅第一個書包係邊個買俾你? 如果你問日本人，好可能大部份都會答係自己嘅爺爺嫲嫲公公婆婆買嘅。可愛嘅孫仔孫女升上小學，作為長輩當然想買份禮物賀一賀佢，實用嘅書包就成為一個好好嘅選擇啦。為咗見到孫仔孫女喜悅嘅笑容，長輩們都好捨得洗錢，全家人一齊喺百貨公司左揀右揀，為咗買個最好嘅書包。 除此之外，作為父母見到自己嘅仔女為咗下一代升學要付出咁多，自然都會想喺經濟上幫忙分擔一下（始終一個ランドセル平均都要成4- 5萬日圓）。果然全天下父母都係養兒一百歲，長憂九十九。睇嚟喺ランドセルの日除咗感謝個書包之外，都要記得多謝為自己付出嘅長輩。

講到ランドセル嘅歷史原來出奇地可以追溯至江戶時代。相傳呢款書包係喺幕府末期開始引進西式軍隊制度嘅時候同時引入，作為一款存放行軍裝備嘅背囊。

但點解ランドセル又會變成返學用嘅書包呢？明治時代嘅學習院（當時嘅國立學校）推行教育平等理念，提倡 「學校中所有孩子人人平等」，以及「不將家庭環境因素帶入教育」；無論學生家境富裕或清貧，喺學校都應該著一樣嘅衫，擁用一樣嘅物件。去到1885年(明治18年) ，呢個理念再度推進， 提倡「自己返學用品自己拎」(當年嘅富家子弟因為可以坐馬車、人力車，可以兩手揈揈咁返學) ，所以就開始咗普及使用軍隊背囊作為返學書包，等小朋友可以自己孭住返學用品上學去。

ランドセル嘅顏色最初喺明治23年首次被學習院規範，當時黑色被定為主流嘅書包顏色。到咗昭和30年代，普遍家庭都會幫男仔買黑色書包，女仔就買紅色，而呢個約定俗成嘅規範維持咗一段頗長嘅時間。維持咗一段頗長嘅時間。直到2000年代，書包顏色嘅選擇開始增加至12色、24色…… ランドセル嘅顏色已經唔再被性別定型而侷限，小朋友可以根據個性同喜好選擇自己鍾意嘅款式。

到咗現代，ランドセル當然就唔再係打仗用啦，但喺佢就有防災功能。實際發生天災時，未必隨手可以拎到防災用品，呢個時候ランドセル就可以發揮保護小童嘅功用啦。例如喺地震嗰陣，將ランドセル放喺頭上、痞低、將身體摺埋就可以盡量避免被掉落物擊中。甚至乎係連人帶書包跌落水嘅情況下，ランドセル可以作為水泡嘅代替品 (估唔到即使裝滿教科書嘅書包都能夠浮起)。

唔知大家仲記唔記得自己小學用嗰個書包係咩樣嘅呢？入面有無裝滿同朋友仔之間開心嘅回憶？雖然小學個書包可能一早就掉咗，但不妨係呢一日回想吓當年第一次擁用自己嘅書包嗰一份興奮同期待返學嘅心情。最後多謝咁多年嚟幫過自己負載課本嘅各個書包。