更新日：2022/04/05
相信各位留學生、打工仔，商務人士等日本開關等到頸都長，因為疫情反覆嘅關喺，日本不斷短時間內開關閂關，3月1號終於等到日本政府放寬入境限制，除左俾遊客之外嘅外國人入境日本，包括短期商務客、留學生以及已經有工作擔保嘅人士等。
入境日本之後要喺機場接受一次PCR檢測。結果陰性嘅前提下，冇有效疫苗接種證明嘅人士，須要喺屋企或者酒店進行為期３日嘅隔離，並喺第３日進行自我檢測。將陰性結果提交去厚生勞動省，當局就會發出完成隔離通知，證明入境人士已完成隔離。如果已經打左３針疫苗嘅朋友，入境後就無須進行隔離。
➔ 檢疫措施時常更新，建議至 在香港日本國總領事館 網頁確認最新資訊。
有別於短期「返鄉下」人士，中、長期居留日本嘅朋友，初嚟貴境有咩要注意呢？部份學生哥或者打工仔，可能有學校或公司嘅協助。如果人生路不熟，建議出發前，買一張可以喺日本最少用一個月嘅漫遊數據卡，方便隨時上網查資料！最好有埋通話功能，有咩問題都可以直接打去問。
以下介紹嚟到日本需要優先處理嘅三件事：
去區役所/市役所登記住址手續
需要帶嘅野：在留卡
建議喺辦理手續前，再一次確認該區「転入」（遷入申請）時必要嘅文件！
在留卡喺咩東東？
所謂嘅在留卡就喺出入境在留管理廳發行俾中、長期在日居住者嘅一種身份證明卡片。拎到入境許可、改在留資格許可、在留期間更新許可等在留相關事項都會被標記喺卡片上。
每當更改任何在留相關事項嘅時候，都需要去出入境在留管理局辦理更新，日本政府嘅法務大臣就會承認佢喺持有合法在留資格嘅在留卡，亦可以視佢為合法「身份證證明書」嚟使用。所以，喺日本生活嘅外國人如果被要求出示在日居留證明嘅時候，就可以用在留卡嚟證明自己身份。一般需要證明嘅場合，不外乎去銀行開戶、手機簽約、租借房子、考大學、買酒、演唱會入場等等。
圖片來源：出入國在留管理廳
由於入境日本嗰陣已經獲派「在留卡」，到埗完成隔離後，中長期居留者拎到在留卡之後需要喺14日之內，去自己住緊果區嘅事務處（市或區役所）等辦理登記住址手續，如果因為冇打疫苗需要隔離14日嘅話可以同職員說明情況。
※記得如果之後搬屋嘅話，要先去舊住址個區嘅事務處（市或區役所）提交遷出申請，拎埋遷出證明書。喺14天之內去新住址個區嘅事務處（市或區役所）提交遷入申請，之後新住址就會被寫喺在留卡上。搬去外國嘅時候或搬返香港都須要提交遷出申請。
另外，由於國民健康保險證都喺由該市、區、町、村嘅事務處（市或區役所）發行嘅，所以申請遷出嗰陣要一齊交還。喺辦理新住址遷入申請手續嘅同時，可以再領取新嘅國民健康保險證。
喺市役所或區役所辦理完登記住址手續之後，目前住緊嘅地址就會標記喺在留卡嘅背面。另外，只要大概300日圓就可以申請埋「住民票」，同樣可以作為身份證明，租屋嘅時候都有機會用到。職員可能會問你住民票上要唔要印My Number，由於My Number同收入紀錄、稅金等個人資料有關，印咗反而電訊商、地產經記會唔收，所以記得話唔洗印呀！
申請日本電話卡
有齊身份證明就可以申辦手機、電話卡啦。因為申請銀行戶口、租屋、搵工等等，都必須要有日本手機號碼。如果唔想簽長約嘅話，喺網上開通「格安」（平價）電訊商 LINE MOBILE 、樂天MOBILE或者 IIJmio都喺一個好選擇。
以LINE MOBILE為例，所需資料、注意事項如下：
・本人名義嘅信用卡（香港信用卡都得，唔一定要日本信用卡）
・在留卡需要拍攝正反兩面（需要有2個月以上嘅有效期限）
・住民票：3個月以內發行、要印有本人住址同姓名、冇印有My Number嘅住民票
當然亦都可以去docomo/ SoftBank/ au等傳統電訊商上台，但注意有可能需要用日本登記嘅信用卡扣款。
開辦銀行戶口
有埋電話號碼就可以順手申請埋銀行戶口啦！
喺日本銀行開戶口一般需要帶以下嘅野：
- 身份證明文件（護照或香港身份證）
- 在留卡
- 有效嘅My Number文件（My Number卡或My Number通知卡）
- 日本住址證明（住民票亦可）
- 簽名印章（印有姓氏嘅圓印）
- 日本聯絡電話
- 留學或工作證明（如有）
- 少量現金作開戶存款
帶齊上述文件去銀行就可以開戶口啦，注意因為需要用日文填寫申請表，如果唔識日文嘅朋友，可以事前查定自己個名同住址嘅片假名同平假名，方便填寫各類表格。如果喺日本已經有簽發嘅身份證明文件，可以喺部份網上銀行或手機程式開戶。
介紹返兩間對外國人比較友善嘅銀行：
對外國人開戶口嘅審核條件較為寬鬆，而且可以先喺網上填寫申請表，減少排隊嘅時間，較為方便。雖然新生銀行嘅實體分行唔多，但喺網絡銀行嘅功能十分發達，亦設有英文介面，方便外國人使用。開戶時間亦相對較短，只須大概一星期。
喺日本開戶口比較方便嘅銀行。只要準備好所需文件，就可以立即開戶，方便帶住現金又想即刻儲入戶口嘅人士。加上郵局銀行嘅開戶或者銀行服務都可以喺郵局進行，分行位置多而且方便。
其餘好似瑞穗（みずほ）、三菱UFJ、三井住友等銀行，開戶嘅要求比較高，例如要喺日本住一段時間嘅人使用。除左基本所需文件之外，亦可以帶埋員工證、學生證等證件，以備不時之需。打工仔可能須要提供埋在籍證明書、就勞勤務證明書等等。
最後，歡迎你嚟到日本！下篇我哋會繼續介紹嚟到日本返學返工需要知道嘅資訊，記得留意啦！