喺日本，想喺市中心租到間又平又靚交通方便嘅屋真係唔容易！新手上路上篇講到，拎咗在留卡、搞掂手機號碼之後順便去埋銀行或郵局開戶口，完成哂所有手續就可以去租屋！未睇上篇嘅話，㩒呢到！
日本租屋需要嘅文件同資料：
- 護照面頁影印本
- 在留卡或住民票
- 留學生：入學通知書、就學證明書或學生證
- 就職者：内定通知書、在職證明書或收入證明
- 收入證明（例：源泉徴収票）或存款證明。通常負責俾租金嘅人，例如：父母嘅銀行帳戶存款
- 日本緊急聯絡人嘅聯絡資料
- 擔保人嘅聯絡資料（根據租屋類型，有時會要求提供一位住係日本嘅擔保人）
- 印章、日本手機號碼、日本銀行帳戶
日本有咩類型嘅屋可以租住呢?
日本嘅房屋大約分為以下幾種：
1. 學生宿舍
部份學校有專門嘅學生宿舍，但亦有學校只係協助介紹學生租坊間宿舍。嚟到日本之後如果喺住宿方面有困難，可以先向就讀學校嘅負責櫃台查詢。
2. 公屋
日本都有公共房屋（又稱團地，「団地」），係由都道府縣及市區等地方單位所提供嘅公營住宅。有部份單位外國人都可以申請，不過申請人及同居家屬喺申請果陣，必須喺在籍嘅都道府縣住夠1年以上。另外，即使有申請資格，位於市中心交通較方便嘅公屋相當之多人爭，所以都幾難申請到。詳細情況可以向各都道府縣嘅 住宅管理課 查詢。
3. 日本公司嘅員工宿舎
部分日本企業會提供宿舍作為員工福利。另外，公益財團「法人留學生支援企業協力推進協會」透過同大企業合作，協助留學生入住租金實惠嘅員工宿舍。詳情可參考佢哋嘅官方網頁，或向大學嘅負責櫃台查詢。
4. 民間出租房屋，有以下幾種：
a. 公寓（アパート）：木造建築或者非鋼筋水泥建造嘅住宅，多數為2層樓。冇管理員，亦冇公共設施。隔音、耐震度同安全性都比較差，但租金相對較平，適合預算比較少嘅人。
b. 公寓大樓（マンション）：鋼筋混凝土建造，多數3層樓以上。越高層嘅房租越貴。大多有管理員同大門鎖，所以安全性較公寓高，唔洗擔心陌生人直接㩒你門鐘，租金亦相對較高。
c. 單棟出租嘅房屋（賃家）：普通1層嘅平房或2層建築，附有庭院。
d. 出租房間（Share House）：出租房間係指同包租公以及其他租客住喺同一棟建築物。用同一個大門，廚房、廁所、浴室都喺共用，部份Share House有獨立廁所同浴室。雖然只係租借房間，但都有其他唔同附帶嘅條件。
e. 寄宿（Home Stay）：住喺日本人屋企。雖然可以了解日本文化同習慣而希望入住者較多，但能夠接受嘅家庭相對地少。
搵屋、租屋須知
首先要考慮清楚自己每個月可以俾到幾多房租費。因為房租費會因應地區、樓齡、設備、大細而有不同嘅收費。一般嚟講，越近市中心就越貴，遠離市中心就越平。另外，近唔近車站、周圍環境配套、日照等等都直接影響該住宅地受歡迎嘅程度。
留意到日本租屋，經常出現「1LDK」、「3DK」、「6帖」等字眼，喺咩意思呢?
L：客廳，Living room嘅簡稱。
D：飯廳，Dining room嘅簡稱。
K：廚房，Kitchen嘅簡稱。
1間房加廚房叫1K（鋼筋混凝土造嘅房屋叫做「ONE ROOM」）。1LDK前面嘅數字喺指房間數，所以表示該單位嘅配置有1間房，客廳、飯廳、廚房各一間；3DK表示有3間房，1飯廳1廚房嘅意思。
順帶一提，香港人買樓都鐘意坐北向南，日本亦都同樣鐘意向南嘅房間，東、南、西、北，同一層可能因為方位，房租就差成2千日圓。向南之所以咁搶手喺因為房內採光度高，日頭幾乎唔需要室內照明，所以曬衫較容易乾，適合長時間在家工作、唔出門嘅租客。
帖：喺日本計算房間大細嘅單位，唔用坪數嚟計，而喺用「帖」同「疊」為主，簡單講就係用幾多張TATAMI大細嘅方式嚟計算，6帖大概等於100呎。
租屋去邊搵好呀?
1. 搵學校幫手
如果就讀日本大學、專門學校或者語言學校，可以直接向學校事務處查詢。
2. 地產經紀
喺車站附近好多，通常都寫住「乜乜不動產」或者「乜乜ホーム」嘅招牌。門口同窗都會貼住好多出租單位嘅廣告。
3. 日本嘅租屋網
第1次喺日本租屋，可以搵專門做外國人生意嘅地產公司。詳細可參考以下網站。
※如果有啱心水嘅單位，就最好即刻打電話問啦！即使俾人搶咗頭啖湯，都可以改問有冇類似嘅單位！
租屋須知
- 單位內有冇包傢俬
即使有廚房同鋅盆，但冇Gas爐嘅情況都好多。燈、窗簾、冷氣機等都要自己準備。 - 1個月嘅租金
有時候會包埋該月份嘅管理費、公共區域嘅共益費。若果比約定日期遲交房租1個星期以上，有時要俾10％左右嘅延遲金。 - 押金，禮金，仲介手續費等費用
簽約果陣，需要準備埋押金，禮金，仲介費，租金等合共約5～6個月房租嘅錢。
| 押金 | 即敷金，作為遲交租或者房間損壞時須支付嘅保證金，會暫時寄放喺包租公果度。約為1～2個月嘅租金。喺退租後扣埋清潔費、維修費後會將部份餘款退還。 （但基本上唔退得好多） |
| 禮金 | 需要向包租公支付一筆謝禮，感謝包租公願意將間屋租俾你，約為1～2個月嘅房租。 |
| 仲介手續費 | 如果請經紀幫手搵嘅話，大部分都會收取一筆仲介費，約為1個月嘅租金。 |
- 擔保人費用
喺日本租屋嘅外國人需要搵日本人做擔保，包租公先會願意將間屋租俾你。若果喺日本冇認識嘅人，有一種保證人公司嘅服務。而家大部分都喺要求保證公司（管理公司指定）保證公司費用約50%～120%租金。保證人公司可以由租客自己搵，但搵到之後同樣都要通過保證公司審查。 - 火災保險
日本租屋時規定必須加入火災保險，約2萬日圓左右。（通常2年合約，合約更新時需要再繳交一次） - 換鎖費用
為安全起見，第1次入住時都會更換新鎖，費用由租客負擔，約為1～2萬日圓左右。 - 契約更新費用
另外，喺日本租屋多數簽2年約，2年後若果要續租，就要再繳交更新費用，跟返地區同房型，約為1個月嘅租金。
各式各樣嘅費用，依照地區唔同，日本租屋初期費用通常為租金嘅4～6倍，例如月租喺7萬日圓，咁簽約果陣大概要拎28萬～42萬日圓。
透過地產經紀介紹
- 講清楚自己想租屋嘅條件，如果有啱心水嘅單位，可以直接約經紀睇樓。
- 透過經紀搵屋時，最好搵埋日文好嘅朋友或者擔保人一齊去，避免雞同鴨講。
- 若該單位比起同區租金平好多或急放租嘅話，嘗試問吓背後原因，業主背景同是否兇宅等等。
- 有啲時候，會被要求俾手付金（又稱訂金）。交咗呢筆錢之後，就可獲得租借該單位嘅優先權。一旦決定搬入去，呢筆錢就當喺押金同權利金嘅一部分；但最終未能入住嘅時候可唔可以退返呢一點必須同經紀充分確認。
睇樓時注意事項
- 附近有冇超市、藥妝、商店街等
- 交通方唔方便，離車站嘅距離，通常會寫從乜乜站徒步幾多分鐘，但實際步行時間可能有出入，建議大家親身由車站行去該單位，留意返條路有冇上坡落坡、交通燈位、夜晚條街光暗情況等等！特別喺朝早繁忙時段同夜晚。
- 日照情況
- 確認周圍環境噪音情況，特別喺朝早同夜晚
- 事先確認可以用邊種取暖設備，為咗防止火燭，亦有禁止使用煤氣，石油暖爐嘅木造房
收樓時注意事項
拎到鎖匙後要驗樓，記得睇吓間屋有冇咩大問題，例如：地板花咗、牆身有釘窿等等，如有以上情況，記得影相留證據同包租公備案，證明搬入去之前已經有，部份無良包租公會因單位出現瑕疵而乘機唔退押金。
簽租約時注意事項
- 租約文件通常1式2～3份，包租公、租屋人、擔保人嘅住址、姓名，蓋印章後各自保管1份。
- 租約嘅書面格式大部分由包租公準備。另外，由地產經紀做包租公代理人都唔少。
- 租約有寫明合約期間、押金金額等詳細內容，所以到解約之前都要好好咁保管。
- 睇清楚合約內容先好簽約，一旦簽咗名、蓋咗章就有法律效用，所以睇清楚理解完內容之後先簽名、蓋章。有唔清楚嘅地方，可以向學校嘅留學生負責人或地產經紀確認。
- 日本租屋除咗簽約者以外嘅人都唔能夠居住，如果要2個人一齊住，一開頭要向地產經紀或包租公講明，如果有朋友短期嚟暫住，都要事前同包租公講聲。而且冇包租公嘅許可之下係唔可以自己對房屋進行改造。
唔續約、搬走時注意事項
唔續約，搬走前都有個通知期限，呢點合約上有明文規定。一般喺1個月之前通知包租公。如果好趕急咁搬走而未有提前通知嘅話，就算冇住都要俾返1個月嘅房租。
原則上搬走之後嘅房間狀態必須同入住果陣一樣。唔要嘅嘢按照規定方法扔棄。另外，搬走之前記得交埋電費、水費 、上網等等費用。
日本租屋雖然有唔同嘅規定，搵屋亦可以請經紀幫手，但亦有唔願意將房屋租俾外國人嘅包租公！但唔需灰心！網上亦有專為短期租屋嘅外國人而設立嘅地產公司，標榜唔需要保證人、仲有埋傢俬，希望大家都可以喺日本租到啱自己心水嘅房屋啦！