五月病

過完悠長嘅復活節假期，又連續兩個星期享受完long weekend，唔知大家重有無心機做嘢呢？對於日本人嚟講，過完五月黃金週連休後都可能變得無心情返工返學，甚至已經患上「五月病」。

五月病病徵包括：做事提唔起勁，食慾不振，失眠、低燒、全身乏力、頭痛、腹痛、心悸等等。 伴隨住以上嘅症狀身體逐漸變差，繼而開始出現缺勤嘅情況。不過五月病其實並唔係正式嘅病理學名稱，以醫學角度嚟講，係指患者有適應障礙或抑鬱嘅徵狀。

咁點解會喺五月分特別容易患上呢個病呢？由於日本普遍升學、就職都會喺四月份開始。雖然展開新生活確實係值得令人期待嘅事情，但面對如此巨大嘅環境轉變，就變得容易産生壓力，而去到五月左右就會達到緊張同疲憊嘅高峰。如果唔能夠適應嘅人，就容易喺五月黃金週左右開始出現五月病病徵；即使放完長假仍然覺得得唔到充分嘅休息，做嘢難以集中精神，唔想返工返學。

其實任何人都有機會患上五月病。除咗因為對環境改變唔適應之外，其中以完成考試或者工作等大目標後而陷入倦怠狀態嘅人都有可能會中招。另外重有生活唔規律、容易患上適應障礙、抑鬱症等疾病嘅人都要注意一下自己有無五月病，呢類型人嘅性格特點係認真、有責任感、鍾意親力親為、事事攬曬上身、凡事都要做到最好。但即使你有幾咁熱愛工作，天災人禍都阻唔到你返工都好，如果覺得力有不逮，就應該主動向身邊嘅人尋求幫助，以免導致身心過勞啊。

要預防五月病，最好嘅方法當然就係避免壓力爆煲。 以下喺一啲預防五月病嘅建議： 

1. 持續自己嘅嗜好
   做吓自己鐘意嘅嘢，例如睇書、唱K、砌模型、畫畫、煮嘢食……去將壓力釋放。另外重可以發掘新嘅興趣或者嘗試新事物。
   
2. 做運動減壓
   將精神疲勞透過運動轉化為身體疲勞。因為精神疲勞喺休息過後都較難恢復，但身體疲勞就可以透過短暫嘅休息嚟恢復。
   
3. 重設身體嘅節奏!
   無規律嘅生活不但傷身，而且重好容易損害精神健康。另外電腦、電話、電視嘅藍光亦可能打亂我哋自身嘅節奏。所以避免開夜車或者瞓覺前使用智能裝置，早睡早起，朝早曬吓日光浴去調節一下。
   
4. 尋找傾訴伙伴
   向身邊有類似煩惱嘅親友訴吓苦，幫自己舒緩一下壓力同埋獲取建議以擺脫當前嘅困境。另外搵精神科醫生等專家尋求意見都係一個方法。

除咗日本人之外，其實香港人都曬出名大壓力，絕對係容易患上「五月病」嘅族群之一。所以如果你覺得自己有上述嘅徵狀並且持續兩星期以上，就要及早搵專業人士求助啦。