最近日本終於開關，逐步俾旅客入境。加上日元大幅貶值，大家有冇入定彈藥，準備之後再去日本瘋狂購物同食嘢呢？無得去日本咁耐，唔知大家仲記唔記得日本紙幣係咩樣嘅呢？
現時日本主要流通嘅紙幣有三款，分別係一萬円、五千円同一千円。上面分別印有慶應義塾大學創辦人 — 福沢諭吉、明治時代女小說家 — 樋口一葉，同埋細菌學家 — 野口英世三位日本出色嘅人物。 而背面則分別印上平等院鳳凰像、江戶時代畫家 — 尾形光琳所畫嘅燕子花圖，仲有富士山同櫻花。各款紙幣都極盡日本特色。
但係不久嘅將來，就要同呢三款紙幣講再見喇。 為咗加強防偽特徵，日本政府喺2019年4月宣布將會於2024年上半年度發行新一批貨幣。而紙幣嘅設計同印喺上嘅人物亦隨之有所變更。
喺一萬円新鈔嘅正面，會印有被稱為日本資本主義之父嘅企業家 — 渋沢栄一 (しぶさわ えいいち)。佢除咗開設日本第一間銀行 — 第一國立銀行之外，亦有份創立東京證券交易所等等，起過500間以上嘅日本企業。而紙幣嘅背面就以東京地標 — 東京車站作為背景。
新一萬円鈔票設計
資料來源：日本銀行
至於五千円新鈔嘅正面，就用咗日本首批派往歐美留學嘅女學生之一 — 津田梅子（つだ うめこ)。同令和新時代一樣，佢積極提高女性地位，並且喺1900年創辦咗日本第一間私立女子高等教育機構女子 — 英学塾（現為津田塾大学）。而紙幣背面則畫上同女性溫柔典雅相襯嘅紫藤花圖案。
資料來源：日本銀行
最後介紹嘅係一千円新鈔，上面所描繪嘅日本傳染病學家 — 北里柴三郎（きたざと しばさぶろう）曾經喺德國留學，研發出破傷風治療法。佢喺1894年被派往到當時鼠疫横行嘅香港。喺研究鼠疫嘅時候，發現咗耶爾森菌，為防治鼠疫確立重要嘅一步。除咗研究，佢亦對教育作出重大貢獻，建立咗北里研究所(北里大學嘅前身)同慶應義塾大學醫學院。因此，佢更加有日本現代醫學之父嘅美譽。而新鈔背面就有香港人都好熟悉，葛飾北斎所畫嘅富嶽三十六景「神奈川沖浪裏」。
資料來源：日本銀行
新鈔上描繪嘅三位人物，可能比上一代嘅肖像人物知名度無咁高，咁佢地又係點樣被揀選出嚟嘅呢? 原來新鈔上嘅肖像候選人，通常都係日本學校教育入面經常被提到嘅人物, 之後再根據 1) 相片保留度、2)人物品格、 3) 國民間嘅知名度 而篩選，最後就由財務大臣決定。
Source: 独立行政法人国立印刷局
今次嘅新鈔帶有多種新嘅防偽特徵。例如用高清水印印出嚟比以往更精細嘅圖紋、深凹印刷喺部份位置製造出嚟嘅獨特觸感，以及微縮印刷等等，令新鈔難以被複製。
資料來源: 独立行政法人国立印刷局
新鈔上印有要用放大鏡先睇到，並且無法用影印機複製嘅微縮文字 — 日本銀行嘅羅馬拼音
「NIPPONGINKO」
而其中一項新技術，係世上首次喺紙幣上應用嘅3D全息技術。隨住視角改變，3D全息圖上嘅人像臉向都會轉動，好似哈利波特入面會郁嘅人像畫咁。
日圓新鈔係世界首次應用3D全息技術嘅紙幣
除咗防偽特徵，今次亦喺設計方面照顧到各類型嘅使用者。例如新鈔上面嘅凹位，視障人士只要用手指輕輕觸摸都能夠輕鬆識別鈔票金額。另外，亦將阿拉伯數字改得比漢字數字大，咁就連睇唔明日文嘅外國人都可以輕鬆理解，真係十分細心嘅設計呀！
幫助視障人士識別鈔票種類嘅凹版印刷圖案。
將會發行嘅紙幣上阿拉伯數字改得比漢字數字大，令唔識日文嘅人都能夠容易理解。
日本鈔票印刷技術先進，難以偽造，而且設計細心，望落十分乾淨。拎上手唔會令人有厭惡嘅感覺，所以好多日本人都對佢地嘅鈔票好有信心。再加上日本天災頻繁，一停起電上嚟就會用唔到電子貨幣，所以即使去到電子銀包相當普及嘅宜家，紙幣依然被廣泛使用。其實香港都係一樣，紙幣仍然喺市面十分流通，但係大家總係要袋定一兩張紅衫魚喺銀包先至安樂。即使發生大停電，無電話用，都仲可以落街買到個飯食呀嘛。
資料來源: 日本銀行，独立行政法人国立印刷局