新手上路（上篇）提及，初到日本喺市區町村役所辦理在留卡住址果陣，完成登記後就會獲得同日本人一樣嘅住民票同My Number，
不過住民票會即日發行，而My Number嘅通知卡需要2～3週左右嘅時間先會寄到你手上。
部份住喺日本多年嘅外國人認為有在留卡已經可以當做身份證使用，
都冇特別申請My Number Card，日本政府為咗推廣更多人申請，上年推出咗積分計劃，
有My Number Card喺手有咩著數呢？等我哋黎了解吓啦。
乜野喺My Number （マイナンバー ）？
日文叫「マイナンバー」，又叫做「個人番号」，黎自英文嘅My Number。所有喺日本擁有住民票嘅居民（包括外國人），都會分配到一組12位數嘅個人專屬編號，
而印有呢組編號嘅卡片，就喺所謂嘅個人編號卡（マイナンバーカード / My Number Card）。編號喺由系統自動分配，冇得隨意更改。好似香港身份證號碼一樣，
即使離開咗日本再次入境，重新辦理住民票，My Number都唔會因此而改變。由2016年1月開始，辦理社會保障、稅務同災害對策等相關手續果陣，
都要提供「My Number」。之所以會有My Number制度，喺為咗方便政府公共機構整合所有居民嘅個人資訊，並透過My Number快速確認到個人身份。
因此辦理行政手續果陣，提供My Number以及身份證明文件（例如駕駛執照）就可以加快辦理手續嘅時間。
My Number Card又喺乜（マイナンバーカード）？
My Number Card喺一張正面有你個名、住址、相、出生年月日、性別、個人編號等資訊，背面有IC晶片嘅塑膠卡片。
My Number Card可以當做個人身份證明文件使用，申請My Number Card唔喺強制，必須自行申請先可以拎到。
申請My Number Card有咩方便同好處呢？
頭先講到除咗可以用黎做身份證明文件之外，仲有以下幾點好處：
1.網上辦理行政手續
・網上申請各種電子證明文件，去便利店嘅設備申請各種官方文件，例如住民票、印鑑登錄證明書等文件。
・e-Tax線上報稅系統，年底要報稅嘅「確定申告」，喺2019年開始，
已經可以用支援My Number嘅智能手機（詳情請參考呢度https://www.keisan.nta.go.jp/r1yokuaru/cat1/cat12/cat121/cid960.html）
黎辦理e-tax（電子申請），可以慳返時間唔洗特登去市區町村役所排隊！
2.當做印章登錄證、健康保險證黎使用
My Number Card可以喺醫療機關同藥局作為健康保險卡使用，
需要事先到「Myna Portal（マイナポータル）」https://myna.go.jp/申請使用此功能。
3.儲積分（マイナポイント）
初次申請並且已經拎咗My Number Card，可以獲取相當於5,000日圓嘅My Number積分。
連接到LINE Pay或者PayPay，就可以獲得5,000日圓。
詳情請參考My Number積分官方網站。https://mynumbercard.point.soumu.go.jp/
點申請My Number Card呀？
首先你要有My Number嘅通知書，登記咗住民票嘅外國人都會收到呢張通知書。
My Number通知書（個人番号通知書）
喺用黎通知每位居民佢哋嘅個人編號，通知書上會有全名、出生年月日同My Number。
通知書只喺用黎通知你嘅My Number，唔能夠當作身分證明使用。
大概會喺2～3週後寄掛號信到你登記嘅住址。
如果冇收到嘅話，可以向辦理住民票手續嘅市區町村窗口查詢。
除咗My Number通知書之外，仲會收到以下文件：
・My Number Card申請表（日文：個人番号カード交付申請書）
・My Number Card申請表嘅回郵信封
・My Number嘅說明手冊
當有My Number通知書同以上文件，就可以開始申請My Number Card。
＊第一次申請My Number Card喺免費，但如果因為遺失等原因要重新申請發卡，就要繳交1,000日圓嘅手續費。＊
申請方式有四種途徑：電腦、智能手機、郵寄方式或者喺個人證件快照亭。
由申請日計起至市區町村郵寄領取通知書(明信片)，大約需要一個月嘅時間。
需要拎埋通知書同本人證明文件到指定地點拎你張My Number Card。
詳細申請方法請參考：My Number Card綜合網站- 申辦個人編號卡（中文網站）。
https://www.kojinbango-card.go.jp/zh-tw/
有效期限
My Number Card上會寫埋有效期限，外國人嘅有效期同在留期限一樣，如果唔喺期限內辦理延長手續嘅話，卡就會失效。
當延長咗簽證嘅在留期間，可以去市區町村役所辦理My Number Card嘅延長手續。但如果卡片已經失效就需要再提交申請，
而再申請喺需要俾手續費，亦都唔能夠由代理人申請。
萬一通知卡或My Number Card唔小心遺失咗，需要立即向警署同市區町村役所嘅窗口申報。
另外，仲要致電My Number嘅綜合免費熱線停止卡片功能，以免被不法人士使用。
隨住My Number制度一路擴大使用範圍，可以期待以後會有更多方便在日外國人使用嘅服務。
各位新手喺日本正式開展生活之前，好好了解有關My Number Card嘅注意事項，做足準備！