恩愛港人夫妻檔　格仔餅美食車: Glades Kitchen

受到新冠肺炎疫情影響，唔少人都會減少出街食飯，外賣自取、外賣專門店、美食車等成為咗消費者另一個選擇，市面上外賣專門店、美食車嘅數量都應時而增。美食車嘅種類好多，可以賣主食嘅飯類，亦可以有簡單咁賣咖啡。而最近喺東京眾多美食車之中，出現咗一架以港式甜品為主打嘅美食車。 

Gladys同Desmond係一對40代嘅港人夫妻，佢哋嚟日本之前唔好話美食車，就連飲食業嘅經驗都無，不禁令人好奇點解佢哋會選擇喺日本搞美食車。原來佢哋兩個一直喺香港IT界打滾多年，對於每日一成不變嘅生活感到疲倦，所以決定把心一橫，轉變下生活環境。而佢哋夫婦兩人都好鐘意日本，以前成日都會嚟日本旅行。而今次負責答我哋問題嘅Gladys亦話：「我哋覺得日本同香港嘅生活節奏真係好唔同，喺香港乜嘢都講求要快，每日都好忙碌，而家嚟到日本起碼可以放慢一下腳步。同埋日本人俾我哋嘅印象都係好有禮貌同友善。不過我哋都好清楚嚟日本旅行同生活始終係兩回事，唔可以直接相提並論。」   

美食車就係喺佢哋當初計劃移居日本，喺網上做資料搜集嘅時候發現嘅選擇。 而選擇格仔餅，係因為可以喺美食車入面整到，而又有香港特色嘅食物。考慮過設備、車內空間、食材同其他因素後，佢哋認為格仔餅可行，而且東京仲未有美食車賣格仔餅，最後都係決定整格仔餅：「見到客人食甜嘢，露出幸福嘅笑容，我哋都好開心㗎」。

二人三足跨越難關 獨樹一格嘅格仔餅款式

決定好目標之後，就要朝住目標努力前進，但前路並不易行。買咗美食車後，Gladys同Desmond一直都忙於申請各類牌照。「雖然話有車牌就可以去到日本全國任何一個地方，但係一去到經營美食車就係完全兩回事。每一個都道府縣都需要個別去申請營業牌照，亦都要分別到各地指定嘅保健所到搞手續。我哋而家就只可以喺東京都、神奈川縣同埼玉縣到做生意。」 見到佢地每日朝氣勃勃咁開檔，背後原來跨越咗重重困難同語言障礙，不禁令人感到敬佩。

終於到進入研究蛋漿配方的階段，兩個毫無經驗嘅外行人倚靠記憶中嘅味道，經歷一次又一次嘅失敗將網上嘅配方加以改良。「諗加配料夾啲咩之前最重要都係整好個餅底先，上網睇咗基本recipe之後就不停整不停試食(哈哈)所以個餅底係我哋嘅講究位，比起香港嘅格仔餅會厚身啲，同埋無咁甜，因為要夾嘢嘛。同埋就算唔係即刻食，拎到返屋企，個外脆內軟嘅口感都唔會差太多，同埋當飯後甜品咁調整咗個size。都有香港人嚟食過之後覺得好驚訝，話無諗過原來格仔餅咁樣整都work㗎喎。」兩人千辛萬苦研發嘅格仔餅，保留到香港味道嘅同時，亦都加上咗創新獨特嘅創意。

人氣之選：香港本地風味

「香港風原味」

格仔餅當然係夾住花生醬、椰絲、煉奶同砂糖！

夫婦創意之作

「吞拿魚芝士拉絲」

竟然係鹹嘅格仔餅？

香港人都嚇一跳：港日合璧

「牛油紅豆蓉」

參考日本喫茶店嘅人氣之作！

※部份口味會因應季節或入貨情況而有所變動

視逆境為鍛鍊　以積極心態度抓緊機會

當一切都準備就緒，終於開始營業嘅時候，突然又被持續多時嘅疫情打亂晒計劃。佢哋最初由喺2019年決定搞美食車，開始落手準備，直到2020年頭疫情蔓延加劇，令到佢哋2020年夏天開業便立刻進入「冰河期」。「嗰陣大家都唔知將來事，反正我哋都準備好晒，點都好都試下做住先啦」，「最初嘅時候街上真係人影都無隻，但係而家都開始慢慢多返啲人流啦」，「通常美食車係靠喺啲大型活動入面嘅收入嘅。但係個陣啲大型活動呀，體育比賽之類全部都停辦晒。所以其實都幾難做落去。」Gladys 苦笑住咁向我哋坦白赤裸現實嘅一面。

我哋再問Gladys有無曾經後悔過行呢條喎，又或者會埋怨覺得時不與我。「兩樣都無喎，被疫情影響到嘅又唔係只得我哋。而家諗返起，反而覺得因為經歷過呢段疫情，先至會令到我哋成長咗好多。」Gladys嘅回答意外地正面。之後我哋嘗試繼續追問實際上成長咗啲乜：「例如打工仔Lunch Time時間都好短，所以我哋都盡快俾到商品佢哋，等佢哋可以有多啲時間休息。同埋最近都開始多咗可以喺大型活動到開檔嘅機會，有時啲客都會多到排晒長龍。難得佢哋喺眾多食物車之中選擇咗我哋，所以我哋都會想盡快出到食物俾佢哋。我哋之所以而家啲餅可以整得咁快，都係多得開業初期嘅「冰河期」。趁客少嘅時候熟習各種步驟，亦都知道咗點樣可以最大運用車內淺窄嘅空間。同埋我哋可以有機會問吓啲客食完之後嘅感想，等我哋有改善嘅空間。假如無咗呢段時間，要我哋突然喺啲大型活動入面擺檔，我諗我哋啲餅可能會出得好慢，亦都會無咁好味，話唔定會劣評如潮。正因為有呢個難關先至會有而家嘅我哋。不過當然我哋而家都仲有好多改進嘅空間嘅。」

聽到呢到覺得成件事都幾好笑，佢哋明明喺香港做IT嘅時候要趕deadline，結果嚟到日本開美食車之後都仲係要趕deadline，唔通香港人真係辛苦命？(笑) 但係一路聽住Gladys講，又睇佢哋整格仔餅，覺得就算IT同整格仔餅同樣講究速度，佢哋仲係被時間追趕緊，但係工作心態上都一定好唔同。呢個轉變應該就係佢哋嘅出發點唔同咗，喺香港做到好似機械人咁嘅佢哋，嚟到日本之後藉住美食車，搵返自己本來嘅心同感情。

感動與印象深刻嘅相遇

由於今次係我第一次採訪美食車嘅關係，於是忍唔住問咗好多佢哋關於經營美食車嘅趣事。「最初喺公園開舖嗰陣，都吸引到唔少家庭客。經常會有小朋友指住車外面啲相問父母「呢個係咩嚟？」其實咁都好正常，始終香港格仔餅喺日本嘅知名度依然非常之低。「通常咁樣被小朋友問完嘅父母都會對格仔餅感到興趣，聽我哋介紹完之後都會幫襯我哋，但通常都係買一份格仔餅一家人分享，始終都因為仲未清楚香港格仔餅係咩。有時會想我哋將格仔餅切開三份，切開一半都仲可以，但係一開三就有啲困難，就會忍唔住送多少少比佢哋，見到一家人一齊食格仔餅就非常之開心。」

「當然美食車最辛苦嘅事就一定係溫度同天氣。因為係室外嘅關係，冬天車裏面嘅溫度大概只得7至8度，夏天就最高可以去到42度。去某啲地方做生意嘅時候需要自備發電機，重量大約係20公斤，要搬都幾辛苦吓。」「另外最深刻嘅事係有次喺偶像活動到開舖，即使當日非常大雨，但係嗰啲女仔偶像為咗買格仔餅都冒着風雨跑過嚟我哋架美食車。佢哋套衫本身已經非常單薄，天氣凍之餘又俾雨淋濕晒，係咁嘅情況之下都仲嚟買格仔餅，其實真係好開心。為咗令佢哋唔好比雨淋咁耐，我哋都盡快整好比佢哋。希望暖笠笠嘅格仔餅可以為佢哋嘅心靈同身體都帶嚟溫暖。」

雖然經營美食車唔容易，但係可以認識到不同嘅人。遊走於東京、神奈川、埼玉嘅呢架美食車更係兩人親自設計。從令人從遠處見到都覺得興奮嘅美食車、到特別設計嘅打卡位同精心製作嘅格仔餅等等，每一個細節都非常講究，遇到呢架美食車嘅人都不禁被佢咃兩公婆俘虜。

對未來嘅展望

佢哋話希望有一日可以擁有自己嘅舖頭，但係達成呢個目標之前首先要專注做出好味嘅格仔餅，從而得到客人們嘅好評。「好多日本人仲未知乜嘢係格仔餅，喺我哋舖頭買嘅格仔餅甚至可能係佢哋人生第一次食嘅格仔餅。所以我哋好希望佢哋會記得格仔餅係一樣好味嘅食物。同埋有啲好多鍾意香港嘅日本客人，喺社交媒體上知道咗我哋舖頭之後，為咗食格仔餅都特登遠道而來，我哋都唔可以辜負佢哋嘅期待。」佢哋亦都補充，黎緊會不斷挑戰，繼續研發更多口味嘅格仔餅。

Glades Kitchen呢個名係從兩人名字嘅前半部份合併而成嘅單字，亦都有林間空地嘅意思。兩人希望可以擺脫苦悶嘅人生，更希望可以為其他人帶黎笑容。希望有一日Glades Kitchen都會成為大家生活中嘅綠洲。