關於猿島
位於神奈川縣橫須賀市嘅猿島，面積大概係東京巨蛋嘅1.2倍，係漂浮喺東京灣上唯一嘅無人島，亦係灣內最大嘅自然島。喺島上可以燒烤、露營、釣魚、散步等等。由於以前係軍事重地，長達64年禁止一般民眾進入。明治時代遺留黎落嘅彈藥庫、隧道，成為東京灣要塞遺跡，仲列入國家歷史遺產。毎年一到7月中至8月，好多人會到猿島嘅海水浴場，就會變到好熱鬧。
猿島嘅歷史背景
由幕府末期到二次世界大戰結束為止，猿島係東京灣嘅首都防衛據點，作為軍事要塞佔有一席之地。島內曾出土有關繩文時代同彌生時代嘅土器同人骨，此外亦有同日蓮上人有關嘅傳說流傳。喺幕府末期，江戶幕府係猿島上建立咗臺場（Daiba，幕府末期為咗防範外國船隻而興建嘅要塞），進入明治時代之後，要塞就交由陸軍省同海軍省所管轄，仲興建咗新嘅要塞同砲台。目前島內仲有殘留好多挖空咗岩壁上紅磚而造成嘅要塞遺跡。二戰後至1961年（昭和36年），猿島俾美軍接管。喺美軍接收期間，1947年（昭和22年）開始有渡船通航、1957年（昭和32年）開闢埋海水浴場。之後喺1993年（平成5年）海水浴場封閉，航道亦被廢止，猿島就禁止進入。1995年（平成7年），橫須賀市受到大藏省委託，重新修葺步道，通航亦重新回復正常。2003年（平成15年），橫須賀市由中央政府接受猿島嘅無償讓與。
雖然猿島目前已經對外開放，但平時只有日頭有船來往猿島。由「Sense Island實行委員會」主辦嘅 《Sense island-感覚の島-暗闇の美術島》，今年冬季期將於2022年11月12號（六）～12月25號（日）逢每星期五六、日夜間舉行，展期為21日。Sense Island 「感覚の島- 暗闇の美術島」係2019年秋天開始舉辦，仲搵咗日本知名創意公司Rhizomatiks Architecture監督齋藤精一帶領，該公司喺設計、藝術同娛樂領域，以突破想像嘅先進科技應用而備受推崇。而活動仲結合黎自日本同海外藝術家及其創意單位，以島嶼空間特徵同歷史為靈感，共同喺唔同地點設置裝置，從而透過喺島上嘅藝術作品令參與者暫時捨棄現代科技同時間，喺黑暗中感受作品嘅同時，嘗試將消失嘅感官搵返黎。
活動概念
好耐以前，人類同自然一齊和諧共生，然後孕育出文明繼而演變成今日嘅文化。但係，由於人類急速發展，用強硬手段改變自然環境，帶黎嚴重嘅影響同造成不可挽救嘅後果。呢個時代係時候重新定義乜野係「以人為本」。
通常大家去睇藝術品個陣，周不時只會掛住打卡影相，但當抵達無人島之後，需要先將自己手機放入信封內，「封印」手機，信封上有緊急聯絡電話（萬一喺島上遇到咩事都可以聯絡工作人員）。然後分批大約20人一組出發。主辦單位希望體驗人士唔好俾手機干擾嘅情況下可以好好欣賞作品，喺黑暗之中用五官去感受呢座美術島。出發前會事先派發地圖，聽完工作人員嘅講解之後，就可以自由喺島上探索唔同嘅作品。
參加費用
想體驗夜間無人島之旅，需要事前喺網上預約導賞團同購票！
費用將於9月中旬公佈，詳情請參考官方網站
Sense Island -感覚の島- 暗闇の美術島 2022
展期：2022年11月12號（六）～12月25日（日）逢每星期五、六、日
時間：日落之後
會場：神奈川県横須賀市猿島1番
點樣去
京濱急行線「横須賀中央」車站步行約15分鐘→行去「三笠碼頭」（搭船地點)
再搭船10分鐘即到達
※横須賀中央觀光
未搭船前想去醫肚，推薦橫須賀市嘅「溝板大道（どぶ板通り）」，有好多漢堡店同美軍相關嘅飲食店、鋪頭。
由於島上大部份展品都唔可以影相，想知道有咩作品展出，鍾意夜間探險同藝術嘅朋友記得唔好錯過，報名體驗一下夜間美術島！