近年日本美食車發展蓬勃，除咗行人專用區為咗吸引消費，間唔中提供美食車租用區域畀消費者停留買嘢食之外，唔少商業區亦會喺平日午飯時間，提供租用場地畀美食車做生意，令到附近嘅打工仔可以買外賣返公司，避免喺餐廳逗留，更可以每日食到唔同種類嘅飯盒。
由香港人Natalie 及港台混血嘅 Ryan 呢對夫婦經營嘅美食車 Hocha（好茶）就專做打工仔午飯時段，主打港式叉燒滑蛋飯，以及由 Ryan 嘅台灣媽媽親自傳授嘅滷肉飯。另外，不可不提嘅係佢哋努力研製嘅魚肉燒賣，同埋達到茶餐廳水吧水平嘅奶茶同檸檬茶。
挑戰由零開始經營美食車
Natalie 同 Ryan 喺2020年嚟到日本留學，由於疫情關係求職困難，於是決定唔做打工仔，把心一橫一手一腳由零開始創業，親自經營生意。之後佢哋發現原來美食車比起實體舖嘅餐廳，店舖投資上嘅門檻相對地低，於是努力搜集資料，參加唔同免費講座，了解多啲有關美食車嘅申請步驟同經營模式。最後，由2021年決定經營美食車，到後來成功申請牌照及簽證，夾夾埋埋用咗半年時間，終於喺今年（2022年）4月正式開業。
鍾情舊式香港
離遠睇到 Hocha 架美食車，見到小巴牌設計嘅「營業中」同埋喺街市用嚟照雞蛋嘅紅色罩燈，就知道 Natalie 同 Ryan 都好鍾情香港嘅元素。美食車內內外外，仲有唔少充滿香港特色嘅擺設同裝飾，例如有紅白藍膠袋、豬仔錢罌以及香港路牌等等。
將香港茶飲及飲食文化帶來日本
之所以會用「Hocha」呢個名，係因為 Natalie 同 Ryan 都好希望將香港好飲好食嘅茶飲及飲食文化帶來日本。
Hocha 嘅菜單主要係，由曾經跟茶餐廳水吧師傳學過下兩下手勢嘅 Natalie 設計。開業初時，Natalie 為咗喺菜單入面加添香港特色，特登選擇咗手撕雞作為主打，可惜銷情唔太理想。「日本人比較講求賣相，而家每個人都用電話影相擺上Instagram打卡，但係手撕雞嘅顏色比較單調，影出嚟唔夠吸引。」
後來佢哋諗到改用香港另外一款特式美食 ─ 燒味作為主打，但又唔想整返好多地方都有嘅「黯然銷魂飯」，所以就設計咗叉燒滑蛋飯。「因為好多日本人都鍾意奄列飯，所以叉燒滑蛋飯個日文，我哋都改咗做チャーシューオムライス（叉燒奄列飯）。」
Hocha 主要喺平日嘅商業區開檔，吸引咗唔少日本人打工仔嚟幫襯。一開始好多人都唔太熟悉香港嘅嘢食，都會揀咗滷肉飯先，但下一次再幫襯就會開始選擇其他食物，一嚐香港美食。有時喺學校附近開檔嘅時候，更加有唔少香港留學生為咗一解鄉愁而嚟呢到，食返個叉燒滑蛋飯同魚肉燒賣。小食類別入面，除咗魚肉燒賣，仲有香港出名嘅雞蛋仔。「試過有一位婆婆唔知道雞蛋仔係咩，我嘗試同佢解釋。佢試叫咗一個之後，立即話好好食，仲買多咗一底話要拎返屋企，當時我好感動！」
試食過百粒燒賣 為求得滿意嘅材料份量比例
因為疫情關係，好多在日港人都好掛住香港食物，其中最令人懷念嘅就莫過於係「一粒難求」嘅黃色魚肉燒賣。正因為咁，Hocha 就自製魚肉燒賣，一解大家嘅思鄉病。Natalie話：「其實燒賣唔難整，食譜亦唔難搵，但係要做到滿意嘅材料份量比例，呢個就唔會有答案，需要自己慢慢調較。」
雖然 Natalie 自己鍾意有魚肉香嘅燒賣，但唔少香港人又鍾意食比較粉嘅質地，兩者之間要取得平衡，其實都有一定難度。為咗平衡兩者需要，Natalie 同 Ryan 認真調較材料嘅比例，試整燒賣試咗成3至4個月，期間食咗成過百粒燒賣。「終於做到滿意嘅魚肉燒賣嘅嗰一刻，我哋好感動。」
給在日港人的話
最後 Natalie 同 Ryan 想同住喺日本嘅香港人講：「如果思鄉嘅話，隨時過嚟搵我哋食返粒燒賣，飲返杯奶茶同檸檬茶！」
