日本終於都開放自由行入境，相信唔少香港人已經急不及待去日本自駕遊。雖然香港同日本都係靠左行駛，但係喺交通法例上，都有好多唔同嘅地方。如果你係第一次嚟日本自駕遊，或者疫情之下太耐冇喺日本揸車嘅話，咁就要多加留意，避免發生意外喇！以下係幾點值得大家注意嘅地方，睇吓大家又知唔知道啦！
1. 路口轉彎
平日喺香港揸車，習慣咗綠燈之後就立即起步轉彎嘅你，呢到就要多加留意喇。日本嘅綠燈其實唔代表可以馬上轉彎，橫過行車線！大部份路口左轉時，行人交通燈同時都會係綠燈，而司機就應該停車，讓行人優先過路，直至所有行人都橫過馬路嘅時候，車先可以橫過。大部份路口右轉時，相反方向嘅行車線同樣係綠燈。呢個時候，司機必須喺虛線方格內等候，直至相反方向嘅行車線冇其他車駛過時，方可橫過。另外，日本嘅交通規則中，行人係第一優先嘅。喺冇紅綠燈嘅斑馬線，駕駛者須禮讓行人優先通行。喺香港習慣咗喺冇紅綠燈斑馬線，唔一定禮讓行人嘅香港駕駛者就要多加留意。
2. 隧道內交通規則
平日喺香港揸車，隧道內不准轉換行車線就係常識。經常會喺隧道出入口，見到有一個不准換線嘅路牌，提醒駕駛者要選定行車線。喺日本，情況就不同。根據交通法第30條第2號，隧道內轉換行車線同爬頭，原則上係禁止嘅。不過，如果單方向有兩條或以上行車線，並且行車線之間有一條白色線嘅情況下，就可以轉換行車線同爬頭。但係有時就算係兩條或以上行車線既隧道，都會有禁止轉線嘅路牌。咁呢個情況，就要根據路牌的指示，想轉換行車線嘅話就要留意多啲路牌畀唔畀你咁做喇。雖然日本部份高速公路內嘅隧道，都容許轉換行車線同爬頭，但係喺隧道裏面發生交通意外嘅機會始終都比較高，如非必要，都係盡量行走原有嘅車線會安全啲。
3. 晚間駕駛
據香港交通法例，於黑夜時間，均需亮起所有車頭大燈及尾燈。「黑夜時間」係指日落後15分鐘起，到日出前15分鐘為止嘅一段時間。香港駕駛者可能會習慣一邊收音機一邊駕駛，而電台亦會廣播當日天文台公布嘅日出日落時間，提醒駕駛者亮起車頭大燈同尾燈。另一方面，當然日本法例亦都有要求駕駛者喺晚間駕駛嘅時候，必須開住大車頭燈同尾燈。但係由於日本各地嘅日落時間有差異，所以就冇規定，話要幾時亮起車頭大燈及尾燈。正因為係咁，為免發生意外，喺開始天黑嘅時候，或者入黑前，預早開著所有車頭大燈同尾燈喇！
4. 新手上路
喺香港考到車牌，一年之內必須喺前後擋風玻璃貼上P牌，並且揸車嘅時候唔可以揸得超過時速70公里。而喺日本其實都差唔多，道路交通法第71條規定，取得車牌一年之內，同樣要喺車輛前後貼上新手駕駛標誌「初心者マーク」。唯一唔同嘅係，日本冇限制新手駕駛者嘅駕駛速度，只要遵守路牌標示同安全許可，開幾快都唔係問題。另外，持有國際牌喺日本自駕遊，雖然唔受此規定限制，但係如果對自己嘅駕駛技術稍感到不安，可以喺日本Daiso或者其他100円店，買個新手駕駛標誌貼喺車身。當日本司機見到你個新手駕駛標誌，通常都會多加禮讓，咁個人就安心好多啦！
其實喺揸車規則呢方面，日本同香港之間仲有好多唔同嘅地方，但係因為篇幅有限，今次就先為大家介紹咗以上四點。希望大家喺日本自駕遊，玩得開心嘅同時，都可以安安全全，順通無阻。