每逢新年，唔少日本卡通人物身邊都會多咗一個圓圓扁扁，上面放咗個桔嘅擺設。呢個擺設叫做「鏡餅」，睇落唔止可愛，食得之餘仲好有意頭𠻹！今次就等我哋介紹下「鏡餅」嘅由來、食法同一啲要注意嘅地方啦！
由來、相關習俗
要講鏡餅，就不得不提一個名叫「鏡開」嘅儀式。鏡開儀式據說係由江戶時代嘅「具足開」儀式演變出嚟新年習俗。當時嘅人習慣喺正月期間（新年1月1日~），供奉鏡餅俾武士嘅盔甲（日本漢字為「具甲」），而等到正月之後就用木槌扑開佢嚟食。因此，鏡餅亦被視為年神喺正月暫居嘅地方，而鏡開儀式就有恭送年神嘅意思。
鏡餅一般由酸橙、2塊疊起嘅圓形年糕、讓葉同四方紅組成，各自有其寓意：
・酸橙：日文發音（ダイダイ） 同「代代」相似，有子孫代代延續嘅意思。
・年糕：由神明寄居嘅神鏡演化而嚟，圓形代表神明嘅靈魂，而2塊疊起就代表圓滿地又大一歲嘅意思（日文入面，「年齡重覆」係年齡增長一個比較婉轉嘅講法）。
・讓葉：係一種只要有新葉生出嚟，舊葉就會枯落嘅植物。就好似舊葉讓自己嘅機會俾新葉成長咁，象徵父母養育仔女，家族代代延續嘅吉祥物。
・四方紅：用嚟舖喺神具上面用嚟放年糕，四邊都係紅色嘅色紙。有拜天地四方，消災解厄，祈願新年繁榮嘅意思。
食法
鏡餅要等到鏡開儀式先可以食，而喺唔同地域，鏡開儀式亦會喺唔同日子舉行：
| 舉行鏡開儀式嘅日子 | 地域 |
| 1月11日 | 東日本、九州等 |
| 1月15日 | 西日本 |
| 1月4日 | 京都府同部份鄰近地域 |
通常放到鏡開儀式嘅時侯，鏡餅都會又乾又硬，可以用木槌扑成細細塊，拎去煮年糕料理。
以下係三款常見食法：
・年糕紅豆湯
材料：
- 年糕
- 罐頭紅豆
- 鹽
煮法：
- 用焗爐或者煎pan焗/煎到年糕表面變金黃色。年糕太硬嘅話，可以用煮代替煎。
- 將罐頭紅豆倒入煲，落同樣份量嘅水，用弱火一齊煮滾，落少少鹽調味。
- 將年糕放入碗，倒埋紅豆湯落去就完成啦！
・雜煮（東京風味）
材料：
- 年糕
- 雞肉
- 小松菜
- 魚糕
- 紫菜
- 日式高湯
- 鹽
- 日式醬油
煮法：
- 雞肉切成一口大細。
- 小松菜恰過之後切成5-6cm長短。
- 魚糕用熱水沖過之後切細。
- 煮滾日式高湯，落雞肉後轉細火。
- 落鹽、日式醬油調味。
- 將煎香後嘅年糕、魚糕、小松菜放入碗，倒入雞肉、日式高湯，擺埋切碎嘅紫菜就完成啦！
・脆米餅
材料：
- 年糕
- 油
- 砂糖
- 日式醬油
煮法：
- 倒大約2厘米高嘅油落鍋，落扑成細塊嘅年糕。
- 不時攪拌，將年糕炸到金黃色。
- 撈起年糕瀝油。
- 將砂糖、日式醬油放入碗，落埋炸起嘅年糕，撈均就完成啦！
注意點
有關鏡開儀式，有3件事注意唔可以做！
※ 喺「松之內」（1月1日-1月7日）完結之前食鏡餅
喺正月期間，年神會寄居喺鏡餅入面，所以喺松之內未完之前就扑開鏡餅，等於係破壞年神嘅居身之所，咁就唔係太好喇。
※ 用刀切鏡餅
鏡開儀式源自日本武士嘅具足開嘅儀式，用刀切鏡餅會令人聯想起武士切腹，所以係一個唔好意頭嘅行為。當時嘅人會用弦線，或者係上面都有講嘅木搥扑碎鏡餅嚟食。
※ 丟棄鏡餅
上面都有提及，年神會寄居喺鏡餅入面，丟棄鏡餅就等如丟棄神明，所以最好都係盡量避免唔好丟喇！如果真係要抌嘅話，要先放係白色紙上面，向鏡餅嘅「左→右→中」灑鹽，包好再放入全新嘅垃圾袋。而喺最後，記得要多謝埋年神先好抌呀！
今次就介紹咗鏡餅嘅習俗喇，唔知大家仲有冇其他日本節日、文化，想再知多啲呢？
最後，祝大家新一年順順利利，平安健康✨
參考資料