JR澀谷站大型改善工程

今年1月初，日本東京嘅渋谷站因為有大型工程，JR山手線嘅一部份路段被逼喺週末停駛咗兩日。相信當時有唔少人有留意當中嘅新聞，或者睇到旅遊專頁嘅相關資訊。今日我哋就嚟為大家講解一下，今次工程嘅具體內容同背後嘅施工原因啦！

2023年1月7號同8號呢兩日，由大崎開往渋谷、新宿以及池袋嘅山手線外環全面停駛，而相反方向，由池袋開往新宿、渋谷以及大崎嘅山手線內環，班次則大幅減少。停運時間實際為53小時30分鐘，呢個亦係JR有史以嚟，連續執行最長嘅工程。

隨住渋谷站周圍唔同嘅大廈同商場都陸續重建，東急東橫線同地鐵銀座線都分別喺2013年同2020年進行過一場大型工程。同樣地，為咗方便乘客轉搭其他路線，JR東日本決定改動埼京線嘅位置，將佢渋谷站嘅月台搬到去JR渋谷站山手線月台嘅隔離；另外整合山手線外環同內環嘅方向，將原本分成兩個月台嘅外環同內環都集中放喺同一個月台上面。

呢個工程由2018年5月開展，一共分為5個階段。正如岩岩所講，喺2018年嘅第1階段，將埼京線嘅路軌搬到去車站東面全新建成嘅高架橋上面；然之後喺2020年5月30日至6月1日嘅第2階段，將埼玉線嘅月台搬移到同山手線嘅月台平排。而到咗2021年10月嘅第3階段，就擴闊咗山手線內環嘅月台面積，嗰時山手線內環都被逼喺週末停駛咗兩日。而導致今次要停運超過兩日，合共53小時30分鐘嘅工程，就係成個計劃入面最大規模嘅第4階段。

今次第4階段嘅目標，係將山手線外環同內環停車嘅位置，搬到去同一個月台。為咗達成呢個目標，首先要將一直用開嘅山手線外環月台，其中嘅一段移除，並且將路軌向西面搬離大約2.7米；另一方面，山手線外環嘅月台都要向西面擴闊3.2米，咁先可以有足夠嘅空間喺同一個月台，容納兩條線。而當日未拆哂嘅舊月台，亦都預計喺日後拆除。另外，為咗更有效疏導新月台所帶嚟嘅更高人流，連接月台同3樓中央閘口嘅樓梯同升降機，位置都需要有所調動。

今次係JR東日本史上最大規模嘅改善工程，由1月6日晚上10點開始，直至1月9日凌晨先完結，總合有4000名嘅工程人員参與，歷時超過兩日。雖然係咁，渋谷站嘅改善工程其實仲未完成嘅。剩返最後一個步驟 – 第5階段，將山手線內外環嘅路軌同月台升高，咁樣先算係真正完成。

今次嘅工程唔單止要喺週末，停駛部分路線同減少班次，更加要喺深夜封閉車站附近嘅部份道路，以便搬運工程器材同建築材料。要一下子動用咁多人力物力，並且要喺預計嘅時間內準時完工，單單係咁樣諗，都覺得呢一項工程實在唔簡單呀。從呢件事可以體現到，JR東日本為咗將對市民嘅影響減到最低，喺實行呢項工程之前，真係做咗唔少準備功夫。希望大家有機會經過完善後嘅渋谷站嘅時候，都可以諗起佢哋背後嘅努力，明白到一個城市、一個地方嘅發展同繁榮都係得來不易嘅。