西田幾多郎（1870年5月19日－1945年6月7日）（下稱西田），生於日本石川縣河北郡森村（現在の石川県かほく市森），被譽為日本近代哲學最重要代表之一。西田以形上學為基礎，從佛教思想同西洋哲學嘅原點出發將兩者融合，獨創出「西田哲學」。換句話講，「西田哲學」嘅出現喺東西睿智相互遇上嘅結果，呢個嘗試前無古人，亦因為呢個極具歷史性嘅創新令西田幾多郎呢個名字載入史冊。
以下將會簡單介紹西田嘅青年時代同佢遇上哲學嘅契機。
青年時代
西田16歲嘅時候（1886年，明治19年），開始喺石川縣專門學校（明治20年改稱為第四高等學校）就讀。當時嘅高等學校為三年制，相當於現今DSE或大學預科課程，係一個培育學生銜接大學課程嘅教育機構。
喺度我哋先簡單紹介，明治時代日本舊學制下嘅高等學校。當年日本全國設有八間同樣嘅高等學校，校名分別由第一高等學校，第二高等學校⋯⋯一路數落去，直到第八高等學校。呢啲學校亦因為呢個命名方法，所以喺日文被稱為ナンバースクール（Number School）。當時一間高等學校，每年大約有300-400個學位，而八間學校每年喺全國總共只係會收大約3000位學生左右，同今時今日東京大學嘅收生差唔多，甚至更少。所以當時能夠入讀高等學校嘅學生，基本上都會被保送升讀大學，而因為咁高等學校亦被當時嘅日本社會視為精英搖藍。簡單嚟講，能夠進入其中一間高等學校嘅西田，絕對係一位名符其實，明治年代嘅精英知識分子。順帶一提，第一高等學校為現今嘅東京大學，第二高等學校即係現今嘅東北大學，第三高等學校就係現今嘅京都大學，而西田所就讀嘅第四高等學校為現今嘅金澤大學（金沢大学），全部都係現今喺日本相當有名氣嘅大學。
返番嚟正題，雖然西田係一位精英知識分子，但佢喺佢嘅學生生涯入面都經歷過唔少挫折。西田出生喺充滿提倡開國改革呢股社會氛圍嘅明治時代，自然成為一位追求自由開放嘅「明治青年」。喺佢高等學校嘅時期，由於不滿學校保守嘅風氣，不時與校方發生衝突，作為一位熱血青年嘅西田，毅然選擇咗中途退學。但正因如此，喺1891年（明治24年）當西田打算報讀東京帝國大學文科大學（現為東京大學文學部）時，由於無持有正式嘅畢業證書，所以無法進入正規課程，只能夠成為一位選科生。選科生雖然同正規學生一樣，需要喺大學就讀3年嘅課程，但呢一類學生完成課程後，係唔會得到正式學士學位嘅。相對於正規學生，西田曾經直言，選科生受到嘅待遇令佢覺得自己好似人生嘅失敗者，即使喺同一間大學嘅圖書館，選科生並唔容許喺閱覧室睇書，要睇只能夠喺走廊睇。雖然係咁，西田仍然好享受學習，並於1894年（明治27年）完成課程。
圖片來源: Wikimedia
黃金十年
大學畢業後，西田返到去出身地石川縣嘅一間中學，開始佢教師嘅生涯。雖然喺1897年（明治30年）轉到去山口高等學校教書，但之後轉輾之間又返番去石川縣。最後喺1899年（明治32年），返到去佢位藍於金澤嘅母校第四高等學校任教，一教就教咗十年喇。
喺呢十年入面，西田喺洗心庵雪門老師門下，接觸參禪及禪學等，並得到居士號「寸心」，被稱為「寸心居士」（日本語：寸心居士）。西田熱衷坐禪修練，成為一位在家人（即在家修行嘅人），研究佛學。與此同時，除咗佛學，西田同樣有接觸西洋哲學，涉獵嘅範疇亦非常廣泛。由古希臘時代嘅蘇格拉底、柏拉圖、亞里士多德，到近代哲學嘅黑格爾（G. W. F. Hegel ヘイゲル）、海德格（Martin Heideggerハイデッガー）、笛卡兒（René Descartesデカルト）等人嘅思想，都係西田嘅學習對象。呢十年間西田開始將哲學研究當作自己嘅終生使命，西田本人亦稱喺金澤渡過嘅呢十年係心身嘅盛年，人生最美好嘅時光。（原文：金沢にいた十年間は私の心身共に壮な、人生の最もよき時であった。）
到咗1911年（明治44年），西田完成咗佢第一本心血結晶《善的研究》（『善の研究』），並且正式出版。《善的研究》普遍被認為係，近代日本第一本正式嘅哲學書籍。當中內容揉合咗西洋哲學同東方精神，兩者嘅相遇為哲學界打開咗新嘅思想道路。喺作品入面，西田提出咗「純粋經驗」哲學（純粋経験の哲学），當中嘅獨特性為哲學世界帶嚟嶄新觀點嘅同時，亦受到西方認同同各方嘅高度評價。
除咗「純粋經驗」之外，西田及後亦提出「場所邏輯」（日本語：場所）、「絕對無」（日本語：絶対無）等多個哲學理論。當中西田用大量時間以及篇幅，去解釋及完整成套「場所邏輯」理論，呢部份被後世認為係西田思想嘅中心。
1945年6月2日（昭和20年），西田幾多郎喺鎌倉市嘅家中（鎌倉市姥ケ谷）罹患急病，病發五日後逝世，終年75歲。離世前兩個月完成嘅長篇論文《場所的理論與宗教的世界観》（日本語：『場所的理論と宗教的世界観』）成為西田最後嘅遺作。
圖片來源: 国立国会図書館