堅持信念 HKストア(hkstore.jp)

喺日本住耐咗，有時會突然想食個鹹魚雞粒炒飯、飲杯熱奶茶、整串咖喱魚蛋……但係飛返香港又唔平，去餐廳食又要就時間，所以如果有得上網買，直接送到埋屋企就好喇 — 如果你有咁諗過嘅話，我哋誠意向你推薦喺日本專賣香港嘢嘅網店 HKストア(hkstore.jp) 。

開店皆因掛念 排除萬難輸入維他奶

HKストア（為方便閱讀，下稱 HK Store）店主 阿秋 原本經營日本藥妝出口嘅生意，到咗2020年遇上疫情冇得返香港，但係又掛住香港嘅嘢食，所以慢慢就萌生將香港嘢食入口去日本賣嘅念頭。2021年3月，HKストア(hkstore.jp)正式開張，當時打頭陣嘅貨品就係香港人耳熟能詳嘅維他奶喇。

用維他奶嚟打響頭炮嘅呢個決定，背後其實有唔少思量。貨品要符合日本人口味、貨源要穩定，最緊要係夠「香港」。而香港製造嘅維他奶正好就符合哂呢啲要求。不過要令呢件事成真，就一啲都唔簡單喇。日本食品入口嘅程序相當嚴謹繁複，負責人須要有相應嘅牌照先可以處理。例如食品檢疫時要提供製作食品嘅步驟、消毒加熱至幾多度幾多秒等等非常詳細嘅資料。除咗要處理呢啲手續，仲要面對埋入口食品嘅關稅、貨品嘅運費、消費稅……

過五關斬六將後，HK Store正式令維他奶登陸日本，喺HK Store嘅網店有得買之餘，依家唔少日本嘅香港餐廳，仲有日本高級超市KINOKUNIYA都買得到喇！

轉換策略 擴闊貨源

其實，輸入維他奶只係HK Store嘅第一步，將更多香港嘢食介紹俾日本人，成為日本人日常生活嘅一部份，先至係HK Store想實現嘅理念。不過就如前面所提及咁樣，將香港貨品輸入日本需要花費大量成本同時間，但係阿秋唔願意為咗節省成本而跳過任何步驟，所以考慮到鋪頭嘅收支平衡，佢最後決定用另一個策略 ー 開拓貨源。

當時阿秋四處出去搵，喺日本同香港有關嘅貨品，例如李錦記（業務用）、Tempo等等。有一次喺橫濱中華街搵到間講廣東話嘅分銷商，經過多番溝通同洽談，逐啲增加貨物類，慢慢就建立到依家大家喺網店見到，琳琅滿目嘅貨品種類。問及點樣決定賣咩貨入咩嘢嘅時候，阿秋明言最緊要都係要符合日本規定，確保係合法、安全，當然亦都會考慮到日本人同在日香港人嘅喜好同需求，確保有人買，維持利潤。

除咗HK Store嘅貨品之外，阿秋話佢都好感謝主動提議寄賣貨品嘅在日香港人，令網店貨品變得更加多元化。目前網店上有各式各樣香港相關嘅雜貨，大家有機會都上去睇下有無自己啱食啱睇嘅嘢啦！

眾籌重現魚肉燒賣

前排日本創作女歌手Milet喺Instagram限時動態到，分享佢食魚肉燒賣，但係就標註咗

「???」，睇嚟好似佢對香港嘅燒賣有啲疑問。咁可能係因為日本人對燒賣嘅認知從來都係白色皮嘅豬肉燒賣，同喺香港食到黃色皮嘅魚肉燒賣，味道同賣相都完全唔一樣，所以先會覺得新奇。而喺2022年嘅時侯，HK Store都曾經試過眾籌，嘗試用日本國產材料，重現「黃色燒賣」（魚肉燒賣），最終招募到195位支持者，成功喺沖繩嘅工場製作出第一批黃色燒賣！

後來雖然有根據客人嘅食後感改良過配方，但非常可惜嘅係當時研發燒賣嘅拍檔決定移居英國，冇辦法再確保到製作質素，所以黃色燒賣喺賣完現貨後，就只能暫告一段落。阿秋亦表示，保持貨品嘅穩定供應係佢營運HK Store其中一個好大嘅挑戰。

環境轉變 繼續探求更多可能性

2023年日本開關，香港同日本之間嘅航班恢復正常往來，以致日本人同在日香港人對香港貨品嘅需求大大下降，令到阿秋覺得要重新思考HK Store到底可以帶到啲咩服務俾喺日本嘅人，喺貨品選擇上都要更加深思熟慮。其中一個新嘅嘗試係２月尾開始嘅『まいつぶ』Podcast，收集在日外國人嘅投稿，分享唔同文化背景嘅人喺日本嘅生活趣事。

雖然搞Podcast同開網店聽落好似大纜都扯唔埋，但其實出發點都係一樣，就係延續香港人呢個身份，令香港依舊為人所知。前路或者方向未明，但呢一刻，阿秋選擇繼續堅持。