日本校服歷史

不知不覺新一年又過咗三分之一，踏入四月意味住日本新一個年度又開始喇，同樣地亦係新學年嘅開始，今次就趁住呢一個機會同大家介紹一下日本校服嘅歷史啦。

日本校服的起源

明治時代初期，日本尚未建立完善嘅教育制度，未有學校嘅概念。喺呢段時期，學生係喺藩校或者私塾等地方接受基礎教育，而呢啲地方亦唔會規定學生授課時候嘅衣着雖然對返學嘅服飾無特別要求，但係大部份人都會習慣着和服返學。而根據記載，日本最初嘅校服係起源於1870年代，學習院（現在位於池袋的学習院高等科）參考海軍軍服設計而成嘅。

第二次世界大戰期間的校服

到咗二戰，當時嘅日本政府喺昭和15年（1940年）公布國民服令，建議全國男性穿着國民服，並且喺昭和16年（1941年）設計咗女性版本嘅標準服。其後由於二戰期間物資短缺，喺昭和17年（1942年）當時日本政府就開始規定全國學校都要以國民服同女性標準服作為校服。

二戰後校服的復活

雖然戰後，所有學生要著校服嘅呢個規定已經取消，但係由於物資仍然非常匱乏，當時日本國民都係照舊着原有嘅校服，基本上好少會見到學生着其他衫返學。但係隨着經濟逐步復甦，再加上1960年代後受到歐美時裝嘅影響，除咗功能性以外，日本人亦越嚟越講究設計同款式。

近年嘅校服

隨住教育方針嘅轉變，學校已經唔一定需要嚴厲嘅校規嚟管束學生嘅行為。大約到咗70年代，日本開始出現可以穿着便服返學校嘅風氣。雖然容許學生穿着便服返學嘅學校日漸增加，不過部份同樣唔制定校服嘅高中卻面臨收生減少嘅困境。有人話呢個情況可以反映學生如果有得揀，都係會比較鍾意着校服返學，所以無校服嘅學校就相對無咁吸引。至於呢個論點係真定假，日本人真係為此而做咗個調查。

根據其中一間最大校服生產商（菅公學生服株式會社）嘅調查，大約有8成嘅高中生認為着校服返學係有佢嘅有必要性嘅。而主要嘅原因，係因為唔使煩惱每日嘅衣着(58.3%)同埋比較似返一個學生（(56%）。另外，日本女高中生視校服為潮流嘅衣着，不單只放假嘅時候會穿着出街，連買衫嘅時候都會購買自己喜歡學校嘅校服。

唔知又鍾唔鍾意日本嘅校服呢？今次就同大家傾到嚟呢到，有機會嘅話我哋下次再講多啲有關日本校服嘅冷知識啦！

參考資料