事隔一年半，我哋日本香港人協會終於喺
2023年6月18日THE BBQ BEACH in TOYOSU再次舉行【港式BBQ】。
上次因天雨關係而取消，由香港空運過嚟嘅燒烤叉同蜜糖終於大排用場。
當日活動包括工作人員共有41位參加者，仲有2位小小朋友，
除咗住係日本嘅香港人外，亦有好鍾意香港嘅日本人參加。
為咗每枱參加者可以互相交流，我哋準備咗Ice break遊戲—白痴仔。
題目包括香港燒嘢食經常出現嘅魚蛋同燒賣（燒賣為白痴仔答案）。
大家圍住爐一路燒一路吹水，互相分享香港近況同在日趣聞，
例如香港物價、在日工作見聞、湊仔經、主婦生活貼士等等，
好快就搵到同自己志趣相投嘅朋友。
最後，我哋準備咗分組遊戲—世界之最，每題贏咗嗰組會獲得檸檬茶或菊花茶。
題目其中一題題面為「最短」，參加者就即刻派出BB做代表，
當主持揭曉題目為「手指公最短」，其他組都二話不說表示唔需要逐位量度，
因為BB真係咩都最短嘛～
雖然之後一題係「手提電話個Mon最細」，BB冇電話就唯有被淘汰喇。
今次活動除咗BBQ係重點，得閒圍爐吹個水都係好重要嘅環節，
多謝咁多位參加者嘅參與，亦多謝其他支持我哋嘅朋友。