Hello 大家好，我係Mandy，住喺日本石川県嘅香港人，因為宣教原因，9年前同屋企人一齊嚟到日本石川縣生活，依家亦係日本嘅非牟利團體Hope轄下嘅光塩ネットワーク（光鹽網絡、下稱：光鹽）負責人，よろしくお願いします。2024年1月1日能登半島發生黎克特制7.6級地震，震源位於離我屋企約100公里範圍內，所以我哋都感到強烈搖晃，企唔穩，但感恩我同屋企人都平安無事。當時我同屋企人前往避難所時發現好多道路都裂開咗，鄰居嘅屋企、附近嘅神社都冧咗。地震亦令到我住嘅區域斷電斷水，感恩我哋可以去朋友家避難。
光鹽係2023年成立，由一班當地嘅基督徒（有香港人也有日本人）所組成，成立嘅目的係藉著服務社區去分享耶穌基督嘅愛，回應聖經所說：「要愛鄰舍」的教導。雖然我哋生活喺外地，但只要我哋有能力都好想為本地人作出一點點貢獻。光鹽希望能接觸一班喺社會底層掙扎求存的基層人士及其家庭，提供支援同服務，如兒童食堂、食物銀行、國際交流活動等。 大家嚟日本玩可能會覺得日本係一個好現代、繁華熱鬧、食得好着得好生活得好，但對於日本國民來說，經濟長年不景，有好多人嘅生活其實好艱難。例如兒童貧窮問題，根據日本厚生勞動省既資料，平均7位小朋友（17歲以下）便有1位面對貧困状態。所以當生活喺日本嘅我哋，就諗係咪可以做啲野去回應身邊有需要嘅人呢？哩個就係我哋組織光鹽嘅初衷。
而係地震發生後，有好多朋友都好關心災區情況，亦開始有在日香港人從東京大阪等揸幾個鐘車運送物資過來，我地團隊裡面亦有曾經係311大地震及九州熊本大地震中做過支援既義工，加上光鹽都集合左一啲捐款（在此多謝一班香港人經日本香港人協會送上捐款），我哋就係1月3日第一次將物資運送到輪島門前市的物資中心，仲記得當時情況幾混亂，路上不斷有好多從四方八面過來救援的消防車及自衛隊的車隊，平日3小時嘅車程，那天我哋來回用咗14小時！當到達市役所的時候，看見流離失所的災民坐在走廊，有人搭起簡單嘅紙皮喺會議室度休息，佢哋無助嘅眼神我到今天都仲記得。唔好忘記，地震發生喺1月，出面仲落緊雪，在停水停電嘅情況下災民唯有蓋上幾層毛布取暖。
及後藉著一次運送物資嘅機會，我哋喺1月19日開始咗喺穴水町煮熱食比災民，試想像離重災區100公里以外嘅地方如我住嘅社區都咁大破壞，能登半島入面嘅破壞程度更無法想像，直到今天（7月）每當見到裡面的情況仍覺得好心酸。由於我哋有開社區飯堂嘅少少經驗，加上眼見災民一日三餐都係杯麵同杯麵（好多選擇，但都係杯麵！），就好想煮餐熱飯俾佢地食。感恩有大家嘅捐款，我哋喺一、兩日內買咗啲爐具、煮食用具，由1月開始，每星期都會去穴水町煮一次飯，而家我哋就會每星期去兩次（星期二：穴水町、星期五：輪島市）。由最初只係煮飯，同災民寒暄幾句便離開，到今天半年過去，我們同嗰邊嘅災民已經成為朋友，每次收到他們為義工隊預備的「回禮」及熱情款待，都令我們感動不已，有啲已搬進臨時房屋的災民朋友更成為我哋嘅忠實義工，會幫手一齊煮便當（笑）。我們可以做嘅真係唔多，但都好想每星期帶住食材及滿滿嘅愛心進入能登，話比佢哋知仲有好多香港人關心佢哋。我哋喺香港土生土長，由細到大嘅教育都係要守望相助，「人生不免崎嶇，難以絕無掛慮，既是同舟在獅子山下且共濟，拋棄區分求共對」，相信每個香港人都好有共嗚，特別離鄉別井嘅我們有更深感受。在異地、異文化下生活難免有唔適應、挫敗嘅時候，但係我相信我哋骨子裡都藏著能屈能伸嘅わざ（技能），加上愛鄰舍嘅心，本地人始終會看到我們的善意，我們相信堅持看到希望。
再次藉此機會多謝大家提供嘅捐款，同日本香港人協會嘅義工親身帶住香港嘅維他奶、檸茶等嚟幫手去探望災民，大家都感到非常開心。嚟緊我哋會繼續一星期兩次到穴水町及輪島市辦社區食堂，亦會派發問卷更新一下佢哋嘅情況並需要。而我哋喺金沢市黎緊會開設一個食物銀行，收集食物及物資後會分發給有需要的人士，不單止是金沢市，我們更希望能將物資帶進能登地區，幫助裡面的人。無論係邊種形式嘅支援，我們都從心底多謝你哋。各位保重，未來見！
攝於2024年7月 與在日香港人前往協助
在日香港人 – Mandy