如果你經常去日本旅行，應該對日本聖誕節嘅習俗唔陌生。每年11月一過咗萬聖節，各大街道、公園同商場就會換上華麗嘅聖誕燈飾（イルミネーション），吸引唔少人前嚟「打卡」。雖然氣氛咁濃厚，但你又知唔知，日本其實係冇聖誕節假期㗎！
講到聖誕節嘅美食，唔似香港或者西方嘅火雞大餐，日本嘅「聖誕主角」竟然係「炸雞（フライドチキン）」同「士多啤梨蛋糕（ショートケーキ）」！由便利店到快餐店，你都可以見到佢哋嘅蹤影。
咁點解炸雞同士多啤梨蛋糕會成為日本聖誕節嘅代表？背後又隱藏住乜嘢商業秘密？一齊嚟揭開呢個有趣嘅日本迷思啦！
炸雞：從外國火雞變成日本嘅聖誕主角
喺日本講起炸雞，不得不提「KFC（肯德基）」。至於將炸雞變成聖誕節嘅傳統，就要追溯到1974年。當時日本KFC推出咗「聖誕就食肯德基」（クリスマスはケンタッキー）嘅廣告活動，改變咗日本人嘅聖誕餐桌。推出嘅原因據說係因為有外國客人抱怨喺日本搵唔到傳統嘅聖誕火雞。KFC見到呢個商機，迅速推出「聖誕派對桶」，入面有炸雞、薯條、沙律等豐富美食，成為日本聖誕節嘅新選擇。
KFC嘅廣告成功塑造出咗家庭聚餐同情侶約會時食炸雞嘅溫馨場景，將炸雞同幸福嘅聖誕節氣氛連結埋一齊。直到今日，每年12月24號，KFC門口都會大排長龍，仲要提前預訂，成為咗日本聖誕節不可或缺嘅一部分。
除咗KFC，近年嚟各大便利店例如 7-11、FamilyMart 同 Lawson 都加入咗「聖誕炸雞大戰」。佢哋喺聖誕節期間會推出限定版嘅炸雞套餐，方便家庭同單身人士輕鬆享受節日氣氛。便利店嘅炸雞價格相對親民，無需預訂，仲可以喺聖誕夜即興買嚟慶祝，深受年輕人同上班族嘅歡迎。
除此之外，一啲炸雞專門店（からあげ専門店）亦會推出特別嘅「聖誕限定炸雞盒」，配搭不同口味同醬料，滿足食客多樣化嘅口味需求。
喺日本，從KFC嘅經典派對桶到便利店嘅限定炸雞，每一款都令日本聖誕節嘅餐桌充滿節日氣氛。呢個傳統雖然係商業推廣嘅產物，但已經成為日本人心目中不可或缺嘅節日習慣。
（1970・1980年代嘅KFC廣告/ 圖源：日本KFC）
（2024年便利店的嘅雞廣告/ 圖源：Lawson/ FamilyMart ）
士多啤梨蛋糕：甜蜜的幸福象徵
士多啤梨蛋糕（ショートケーキ）係另一個代表日本聖誕節嘅美食。由海綿蛋糕、忌廉同士多啤梨組成，鮮艷嘅紅白色唔單止呼應住聖誕節嘅歡樂感，由於同日本國旗嘅紅白色調相同，亦帶有「幸福」同「團聚」嘅象徵。
士多啤梨蛋糕最早由日本知名甜品品牌「不二家 (Fujiya)」喺1922年推出。當時，日本人對西方文化充滿憧憬，但傳統西式蛋糕未必符合日本人口味。不二家創辦人藤井林右衛門先生特別設計咗呢款輕盈口感嘅蛋糕，並將之命名為「ショートケーキ(Shortcake)」，呢個字其實係日本人獨創嘅和製英語。
到咗1950年代，日本經濟飛躍發展，士多啤梨同奶油呢啲高級食材變得平易近人。再加上雪櫃等家電普及，要製作同保存蛋糕變得更加方便。不二家成功將士多啤梨蛋糕同「家庭團聚」嘅理念連結起嚟，逐漸將呢款甜品打造成聖誕節必備嘅象徵。
雖然而家各大甜品店同高級酒店不斷推出創新聖誕蛋糕，但經典嘅士多啤梨蛋糕始終係最受歡迎嘅選擇，無論大人定小朋友都對佢情有獨鍾。
喺日本，士多啤梨蛋糕早已唔只係一件節日甜品，更係一種文化象徵，代表住幸福、團聚同溫馨嘅美好時光。每年聖誕節，當甜品櫥窗中紅白相間嘅士多啤梨蛋糕登場，為日本聖誕節揭開序幕。
（1950年代嘅不二家/ 圖源：家庭画報）
日本嘅聖誕節雖然係源於西方文化，但經過商業推廣同本地化，逐漸發展成一套獨特嘅節日文化。如果你有機會喺聖誕節期間到訪日本，記得感受下佢味獨特嘅節日食品同氣氛喇！