係疫情之前，東京就好似香港人嘅後花園。
東京有咩咁好？無非係多嘢買，多嘢食，多嘢玩。事實上係嚟日本生活之前，小弟都係每隔一兩年就飛一轉東京嘅人，只係掛住嘅通常唔係東京美食，而係公園。無論四日三夜定去足一個禮拜，一定會最少預留半日去公園放鬆心情。
難得放假，又陽光普照，決定去光之丘公園悠閒一下。
講到公園，香港人多數會諗到新宿御苑、上野恩賜公園等等係正市中心嘅大公園。旅行就係爭分奪秒，恐怕唔係個個都鐘意坐半個鐘電車去練馬區嘅公園齋行。更何況光之丘公園唔算櫻花聖地，園內嘅體育館、圖書館亦都唔係普遍遊客會去嘅地方。呢度只係有好多樹，空氣極清新，比每日喺東京返工返學返寫字樓嘅現代人散下心，又容許大人細路都有個回歸自然懷抱嘅機會。而呢兩樣，可能亦都係好多香港人最缺乏嘅嘢。好多人忙得太瘋狂，忙到連屋企附近棵樹都冇見過。
唔查唔知道，原來光之丘公園前身係陸軍設施「成增飛行場」，太平洋戰爭後被美軍佔領。後來1973年歸還日本，其中三分之一嘅土地被開發成公園。園內除左棒球場、射箭場等運動設施，亦設有燒烤場同日營區，最適合當地人放假時親子郊遊。園內有各種樹木花卉，一年四季都會舉行大型活動。
企左喺度望住咁大塊草地，先至醒覺到自己到底幾耐冇聞過草青味。當南生圍迫到爆炸，迪欣湖又多人到想死，終於知道由細讀到大嘅「綠油油的草地」原來可以咁奢侈。坐草地曬太陽食便當，一種好簡單嘅，但發自內心嘅喜悅。
有趣嘅係，佔地六十幾萬平方米嘅之光之丘公園並唔係咩山卡啦地方——佢同購物中心只係一橋之隔，車站行幾分鐘就到。呢個都係小弟最欣賞東京嘅一點：上一秒你可以完全投入自然風景，下一秒又返到去現代大都會。大自然唔係要坐成個鐘車，或者行半日山路先體驗得到；佢應該要隨時都係附近，成為都市生活當中不可或缺嘅一部分。
其實今次寫呢篇文，唔係要介紹光之丘公園，只係想同大家回味下呢種人類本應該享受到嘅生活品味。我哋身為最愛日本嘅香港人，好多都一早試過晒日本最精華嘅部分。但係古樹同大樓對話，草地與馬路同框，又有幾可浮現係我地嘅腦海？香港人「思鄉」時，除左拉麵魚生，紅葉櫻花，都不妨期待下重返東京時，可以喺公園放空下，「偷得浮生半日閒」。