又就黎到日本黃金週假期，今年請5月2號同6號，就可以連放10日（4月29號~5月8號）！雖然暫時返香港仲要隔離最少7日，返唔到香港嘅大家可以選擇繼續留喺日本國內旅遊！今次為大家介紹兩個位於千葉縣嘅好去處，適合一家大細、情侶、親朋好友去！
Kurkku Fields (クルックフィールズ)
集農業、美食、藝術於一身嘅複合型設施，位於千葉縣木更津市，2019年秋天正式運作，預計2022年秋天盛大開幕。佔地約30公頃，大概有7個東京巨蛋咁大。本身由一處偏僻嘅荒地搖身一變成為複合式嘅農場，而且運用多種技術建立自給自足嘅生態圈。
園內仲有自家養雞場同酪農場、有機蔬菜園。而位於園內嘅餐廳、輕食店、麵包鋪都喺採用返自家農場種植嘅蔬菜、雞蛋同奶製品。如果想試吓草地BBQ，不妨約埋三五知己，品嚐一吓園內種植嘅新鮮蔬菜！如果玩得攰想住一晚，園內亦有唔同嘅住宿服務，好似小木屋Tiny House等，可以欣賞一下木更津嘅星空。
園內亦設有多位現代藝術家嘅藝術裝置，分佈喺農場嘅大小角落。其中有為人熟悉「波點女王」草間彌生嘅作品。仲有小型遊樂場，搖搖板、長滑梯等等，啱哂一班小朋友放電，可以玩足大半日！
園內仲設置太陽板同水質浄化系統，提供電力同乾淨食水，實現自給自足嘅環境。除此之外，每逢星期六、日會舉辦導賞團，職人會介紹返農場嘅運作，可以俾大家深入了解吓農場嘅生活。
點樣去：由市中心揸車出發，大概40分鐘！選擇搭巴士嘅朋友可以喺東京站八重洲口搭高速巴士（東京-鴨川線），喺「クルックフィールズ」站落車，詳細請參考官網。
地址：千葉県木更津市矢那2503
營業時間：依官網公布為主
休息日：每週二、三
https://kurkkufields.jp
※由於園內部份設施仲興建中，平日假日暫時都喺免費入場。
船橋安徒生公園（ふなばしアンデルセン公園）
位在東京千葉縣船橋市嘅安徒生公園，被旅遊評論網站評選為「2015年世界遊客人氣觀光景點」，喺日本主題公園項目第三名，名次僅次於東京迪士尼樂園同東京迪士尼海洋。
船橋市同丹麥著名童話作家安徒生嘅故鄉歐登塞市為姊妹市，亦喺呢座大型戶外公園名字嘅由來。公園面積約36.7公頃，重現咗1800年代丹麥嘅鄉村風景。園內分別由五個區域所組成。小淘氣王國區、童話山崗區、兒童美術館區、花城堡區、大自然體驗區。有超級海洋球彈彈床、泳池、仲有超長嘅大滑梯、冒險獨木橋等等，最啱一家大細帶埋小朋友去放電！
除咗遊樂設施，公園內仲有一個大型風車，丹麥建築風格鮮紅色嘅「社區中心」同風車一樣，喺公園嘅另一個象徵，令你好似置身喺童話世界咁！公園內約有100種一年四季盛放嘅鮮花，春天更加可以賞櫻！啱哂一眾情侶、親朋好友去拍照留念。
園內嘅兒童美術館仲會定期舉辦唔同展覽。如果想動腦筋發揮創意，仲可以去埋美術館做手工藝，有紡織、陶藝、染織、版畫等等各種體驗項目。
點樣去：喺三咲站搭開往「小室站」嘅船橋新京成巴士，喺「縣民森林」落車步行約5分鐘，或搭開往「Secomedic醫院」嘅巴士，喺「安徒生公園」下車步行約1分鐘。又或者喺「船橋站」北口5號巴士站搭開往「小室站」嘅船橋新京成巴士,喺「縣民森林」下車步行約5分鐘。
地址：千葉県船橋市金堀町 525
營業時間： 9:30～16:00
休息日：依官網公布為主
票價：成人 900日圓、高中生 600 日圓、中小學生 200 日圓、4 歲以上孩童 100 日圓
https://www.park-funabashi.or.jp/and/