舊式香港嘅主題樂園
踏出電車，喺綱島站嘅月台遠處已經注意到呢橦兩層樓高五光十色嘅建築物。訪問當天落住毛毛細雨，店外鮮明嘅設計，更為街道添上活力。
步入店面，八十年代風嘅復古裝潢就如一條時光隧道，令人沉浸於濃濃嘅懷舊氣氛。一樓嘅兩張摺檯摺凳，配搭不鏽鋼嘅筷子筒，感覺好似返到去香港大排檔食飯。八十港老闆 Kelvin 此時係廚房為下午茶時段嘅食客準備食物，只好坐喺摺凳嗌杯奶茶邊飲邊等。繁忙過後，決定換個位，上二樓做訪問。
上到二樓，牆上滿佈舊式嘅廣告牆紙。其中一面牆寫住「八十港」貌似當鋪「蝠鼠吊金錢」霓虹招牌卻最令人印象深刻。訪問之中透露，店內嘅鳥籠，風扇，收音機，都係Kelvin 委託親朋戚友喺香港搜羅返日本，而店外油上不同顏色嘅鋅鐵信箱，每一個更加係喺香港嘅工匠一一鑄造而成。
餐廳設計及名字原來係一脈相承。被問到點解餐廳叫「八十港」，老闆表示名嘅背後有雙重含意。既身為八十後，「八十港」亦有八十年代嘅香港嘅意思。作為香港輸出自身流行文化嘅黃金時代，八十年代對於老一輩嘅日本人留有濃厚印象。但餐廳嘅裝潢亦吸引到後生嘅日本人注意，時不時會有人詢問某啲復古物品背後嘅故事。
移居日本 保留香港飲食文化
Kelvin 以前嚟過日本工作旅行（Working Holiday），愛上日本生活嘅節奏，如今成家立室，Kelvin 坦言再次長居喺依片土地嘅原因係為咗佢嘅一對小朋友：「(香港現今嘅教育制度之下) 啲小朋友要學呢樣又學個樣，你會覺得好惶恐 … 你回想返自己嘅童年，同埋你個仔嘅童年，係幾兩件事嚟嘅 …（喺日本）我可以交比佢哋選澤返自己嘅人生。」
開業初期，餐廳主打車仔麵。Kelvin 認為車仔麵喺香港已經慢慢變成夕陽工業，喺街邊買少見少，亦冇乜後生一代肯投身做粉麵，因而希望保留依個飲食文化：「希望大家仲可以記得依樣嘢。」
後來餐牌上增加各種小炒及家常小菜，Kelvin 表示好多香港人都渴望食返類近屋企冇味精嘅餸菜：「好似蒜蓉炒白菜咁，其實係喺屋企會做嘅嘢嚟，不能上大台嘅，但反而我就想做下依哋。」
重現香港風味
八十港開業至今，最受歡迎嘅食物莫過於老闆推薦嘅牛雜麵。牛雜麵有齊牛腩，牛柏葉，金錢肚，蘿蔔等配料，啱晒啲鍾意食牛嘅「牛魔王」。另外，湯底以鹵水加清湯製成，帶有甘香溫和嘅花椒味。牛雜麵以外，食客亦可以自選配料創造啱自己口味嘅車仔麵，並有多款粉麵配搭，有粗麵、油麵、河粉等等。
Kelvin 強調，要重現香港人熟悉嘅味道同口感，就一定要直接同肉商入貨。幸好開業前有同行幫手介紹聯絡日本本地肉商，先至買到平時喺日本超市唔會見到嘅部位。
睇一睇餐牌，決定嗌多個鹹魚雞粒炒飯。有別於香港坊間其他餐廳，炒飯嘅雞肉同鹹魚切得比較細，食落較為融和，但鹹魚嘅份量一啲都冇「揸流攤」，每一啖都食到啖啖鹹香。飯亦炒得乾身，粒粒分明。
食完主食，心思思想嗌埋甜品。八十港有做紅豆沙、腐竹雞蛋等中式糖水，但諗下好耐冇食過格仔餅，決定嗌嚟試下。即叫即做嘅格仔餅，切開賣相吸引，食落更有意外驚喜。格仔餅裡面搽咗顆粒花生醬，越嚼越香。除此之外，店鋪亦提供奶茶、凍檸茶、紅豆冰等多款香港茶餐廳常見飲品。
居日港人聚腳點
訪問去到最後，Kelvin 表示：「最緊要大家互相幫忙，互相扶持」，希望八十港可以成為在日香港人嘅聚腳點。呢兩年受疫情影響，大家都少咗同親朋戚友見面，甚至連朋友都無機會識。但喺八十港，有食客變做員工，更有食客變做知心好友。無論你係掛住香港嘅食物，定係香港嘅人情味，都可以去八十港重溫一下。Kelvin 話隨時歡迎大家去搵佢傾下偈，食下野，解解鄉愁。
