喺香港嘅打工仔，每逢一到交稅季節，個荷包好似穿咗個窿咁。而喺日本嘅打工仔，「所得稅」同「住民稅」加加埋埋都唔少野，雖然每年都要交稅，但大家都會好心甘情願咁交，因為交出去嘅稅金可以換返當地嘅特產，包括山珍海味、工藝品、住宿旅遊券同家電用品等等。
乜野係故鄉納稅
ふるさと納税, Furusato nouzei係交稅方式，吸引納稅人向地方自治體俾稅金（寄付, Kifu），類似捐款，黎換取個人減稅嘅政策，捐款嘅同時實質換取地方自治體提供嘅特產或者禮品。申請故鄉稅嘅手續有兩種，一種係自己網上申請確定申告，另一種就由你捐款嘅自治體幫你申請。
故鄉納稅有咩著數？
舉例你今年嘅住民稅要交20萬日圓，喺今年年底透過『故鄉納税』向自治體捐咗7萬日圓後，咁你出年嘅住民税就只需要交13萬日圓咗右。
捐款之後仲可以收到當地自治體寄黎嘅禮品（お礼の品, Orei no shina），例如：白米、和牛、海鮮、水果等等，但要注意嘅喺『故鄉納税』要自己負擔2000日圓，可以將呢2000日圓當作成手續費咁諗。用以上例子黎說明，等於用2000日圓，就可以換取7萬日圓嘅回禮。換言之，捐7萬日圓嘅故鄉稅，相等於減稅68,000日圓。
故鄉納稅制度嘅由來
日本鄉村嘅後生仔去城市讀書打工，導致當地鄉鎮收取嘅住民税難以發展當地嘅經濟，所以日本政府喺2008年正式推出『故鄉納税制度』以振興地方經濟黎平衡鄉鎮同大城市嘅差距、可以將一部份嘅住民稅，捐返俾自己嘅故鄉，好似保育自然環境、醫療福利、育兒教育、文化振興等等，藉此推廣埋當地特產文化，並宣傳地方特色。
點申請故鄉稅
① 預測今年嘅年收，喺今年 12 月 31 日前完成捐款
② 出年1月10日之前，一定要將ONE STOP申請書同相關個人資料寄到該地方自治體。（1月10日喺最終收件日，所以要盡早寄出申請書！）
③ 出年5月尾至6月頭左右會收到「住民稅通知書」（住民税決定通知書）就可以確認住民稅額。
故鄉納稅額有幾多？
捐款額係根據個人年收一齊變動，年收越高嘅人，可捐款嘅金額就越高。 根據今年預期年收入，計算今年嘅捐款額，在呢個限額嘅範圍內，可以選擇捐贈嘅地方自治體同想要嘅禮品。手上有「源泉徵收票」嘅人，可以根據源泉徵收票，姐喺按舊年年收黎推算返今年嘅年收。而今年畢業啱開始做野嘅朋友，可以按每個月實際拎到嘅人工黎試算，姐喺糧單上嘅「差引支給額」或「手取り金額」。
捐款金額試算
而上限金額喺取決於你嘅收入同家族構成，如果你唔能夠準確預測今年年收，最好喺申請捐款之前，先用「模擬器」https://furusato-nippon.com/about/simulation計算自己嘅捐贈金額上限。輸入年收等條件，就會自動計算可控除嘅金額。有分「詳細計算」同「簡單計算」。手上有「源泉徵收票」嘅人，建議用詳細計算，將社會保險、生命保險、親族/配偶撫養、房貸控除通通計入去，咁樣會比較精準。不過要注意呢個只係簡單計算，金額唔一定精確，建議大家唔好咁進取，因為一旦超過咗上限，分分鐘要倒貼！
ONE STOP一站式特例制度
為咗方便大眾申請減稅，日本政府新加咗一項叫做「ONE STOP一站式特例制度」系統，符合系統嘅人申請故郷納税嘅時候就唔洗提交確定申告。
符合以下條件嘅人可以使用「ONE STOP一站式特例制度」。
①今年需要交所得稅並唔需要確定申告嘅人
②１年之內，使用故鄉納税並且捐款俾5個自治體。
如果你係一般嘅打工仔，每年年底公司都會幫你搞「年末調整」，可以利用ONE STOP呢個系統，就可以完成故鄉納稅，否則黎講需要喺出年自己做確定申告。
捐款捐幾多個自治體都好，負擔嘅手續費總數都係2000日圓！另一點要注意嘅地方係如果捐超過5個自治體，就需要自己進行確定申告。
例如：好似福島縣嘅「桑折町」同「湯川村」，即使係同一個縣唔同地方，都當作2個自治體。
- 福島縣桑折町
- 福島縣湯川村
點樣將稅金捐去自治體
透過以下故鄉納稅網站，揀好指定金額內嘅返礼品（回禮，Henreihin）即可進行。如果第一次唔知換咩好，可以參考吓排行榜，好似香港人好鍾意嘅香印提子、毛蟹、和牛，都係非常受歡迎！亦可以搜尋「訳あり」關鍵字，意思係瑕疵品，雖然外觀唔太靚仔但品質味道完全冇問題，而且分量仲會再多啲添！
- 楽天ふるさと納税
記載594 個自治體資訊，捐款仲草埋樂天積分，亦可以用返原本有嘅樂天積分做捐款金。 - ふるさとチョイス
記載1788個自治體資訊，日本國內最大型故鄉稅網站。 - ふるなび
記載 214 個自治體資訊，用信用卡俾錢仲可以拎到捐款額 1% 嘅 Amazon 禮品卡。 - さとふる
記載 560 個自治體資訊，同捐款合併可交埋 docomo、softbank 、au 等公司嘅電話費。
捐款俾你想支援嘅地方自治體，揀好自己想要嘅禮品後，一定要㩒埋「ワンストップ特例制度の申請書の送付」，如果真喺唔記得咗㩒，可以自行到網上下載申請書，並寄到你所捐款嘅自治團體。
故鄉稅申請流程
- 在上述故鄉稅網站上揀選想要嘅商品，俾錢捐款俾自治體。
- 會收到自治體寄黎嘅禮品、申告特例申請書、寄附金受領証明書、ONE STOP制度申請書。
- 填寫完「申告特例申請書」同準備哂所需文件後郵寄返俾自治體。「申告特例申請書」嘅填寫方式跟要咩文件（個人資料），郵寄過黎嘅信件會詳情寫明，如果你有My number個人號碼卡嘅話就可以一卡搞掂！而「寄附金受領証明書」務必妥善保管。
- 完成ONE STOP捐款手續後。出年６月行政機關會處理減免住民稅。
截止日期為出年嘅1月10號，如果唔小心過咗截止日期嘅話，就要喺2月16號至3月15號期間自己去搞確定申告嘅退稅手續啦！（哭）所以遲遲未到收到回信嘅人，一定要係年尾放假前打電話去問啦！
睇完申請故鄉稅手續係咪覺得好似好繁複咁，但其實都係揀個禮品同寄信，由於『故鄉納税』中嘅捐款減去2000日圓會喺出年嘅稅款中扣除，所以意味著好似要先碌卡預先支付一筆金額，仲有等到出年6月先可以扣除。但用2000日圓就可以換取超過2000日圓嘅禮品，仲可以振興地方政府稅收！
如果你啱啱畢業喺日本開始打工，反正都係要交稅，不妨趁年尾挑戰一吓申請故鄉稅，用稅金換取禮品獎勵吓自己。