日本終於都開放自由行入境，相信唔少香港人已經急不及待去日本旅行。但係咁耐冇去日本，有冇忘記日本嘅規矩呢？今次就同大家分享一下遊日必須遵守嘅禮儀啦！
喺交通工具唔可以講電話
平日喺香港搭車嘅時候，唔少人習慣咗收到電話之後就即刻聽，但係日本人為咗唔騷擾到其他人，喺交通工具上通常都唔會講電話。甚至乎建議上車之前，將你部電話設定成靜音或震動模式。電車上亦確實會經常聽到廣播，提醒大家要遵守呢條規則。如果有人有急事打電話俾你，你可以用一隻遮住個嘴，細細聲講俾打俾你嗰個人知，你喺日本嘅交通工具上，唔講得電話，要落車之後先打得返俾佢。有時候如果係非常重要嘅電話無辦法唔接聽，部份日本人會選擇喺下一個站落車，將重要嘅電話講完，先再搭返下一班車。另外，新幹線或者特急等等嘅長途車，好難喺短時間內落車打返電話俾人，咁嘅情況就可以喺車卡同車卡之間嘅空間講電話。千祈唔好貪一時方便坐喺座位到講電話，因為咁樣做會騷擾到附近嘅乘客㗎！
邊行邊食
平時喺香港肚餓嘅時候，唔少人習慣買串魚蛋燒賣，邊行邊食，但係日本人就呢個習慣喇。你咁做嘅話，隨時仲會俾人覺得你冇禮貌添。喺日本便利店出面，經常會見到有人企喺度食嘢，又或者通常只會係祭典等嘅活動，先會見到有人邊行邊食。
另外，有去過日本嘅朋友都應該知道，日本係非常少垃圾桶嘅。每次食完小食之後，都搵唔到垃圾桶，無奈之下只能夠拎返酒店先丟。但係如果喺店舖附近食完小食嘅話，佢哋嘅店員好好，你只要將啲垃圾交俾佢哋，佢哋就會幫你丟，咁就唔使拎住舊垃圾成日啦。
日本冇俾小費嘅文化
去歐美旅行嘅時候，無論係酒店定餐廳，俾小費都係常識。而日本，出名服務態度好，唔少人享受過日本優質嘅服務之後，都會忍唔住想俾小費。但係其實日本係有俾小費嘅文化嘅。即使有遊客打算俾小費，絕大多數嘅情況下，店員都會婉轉咁拒絕接收。但係如果你真係想感謝店員提供咁好嘅服務態度嘅話，其實你只要同佢講一聲「ありがとうございます」(arigato gozaimasu)就得，有時又唔一定要用金錢嚟表達你嘅心意嘅。
試身室入面要除鞋
唔少人都鍾意去日本買衫，試衫嘅時候都有唔少要注意嘅地方㗎。日本嘅試身室通常會喺地下，放一張地毯，而試衫嘅人係唔可以着鞋入去嘅。記住要喺試身室外面除咗鞋之後，先好踩落張地氈呀。另外，有時因為化咗妝，試衫嘅時候會好易整污糟啲衫，所以部份店舖會好貼心咁提供不織布頭套。如果當日有化妝而店舖又有提供嘅，就一定要用喇。而試完身之後，記得要將不織布頭套丟去出面嘅垃圾桶，或是直接交俾店員都得。
俾錢時將現金放喺盤上
喺日本嘅收銀處，通常會見到有一個細細個嘅盤。咁樣係為咗避免收銀員喺收錢嘅時候，唔小心掂到客人「尊貴」嘅玉手而引起尷尬又或者誤會。呢個盤就係用嚟俾客人放啲現金上去，而唔使擔心俾人掂到。另外，日本因為有消費稅嘅關係，貨品嘅價錢通常都唔係齊頭，經常要找續大量散銀，所以用盤去找續大量淩亂嘅硬幣，有助減少金錢上嘅誤會。
仲有其他日本遊客應該遵守嘅規矩想同大家分享，但係礙於篇幅有限，今次就先為大家介紹以上五點。希望大家嚟日本旅行嘅時候，遵守日本嘅規矩，減少任何不必要嘅風險，玩得開開心心啦。