過去兩三年，因為疫情關係，唔少居日香港人都無得返香港，好掛住燒味、煲仔飯等廣東菜。而東京就有一間廣東菜餐廳，正正喺疫情開始期間於神保町開業，直至今日已經發展到喺上野開埋第三間舖，呢一間就係由香港人Henry同廣東人大廚羅師傅一齊起家嘅「粵港美食」。
從IT界毅然轉行做飲食
Henry喺香港嘅時候係做IT嘅，曾經喺日本留過學，所以對日本有種情意結，一直都有翻返嚟日本嘅念頭。恰好因為受到朋友嘅邀請，便毅然決定轉行嚟到日本做飲食業。佢認為做IT界需要每日追上時代嘅腳步，總有一日會有限制，好容易被人淘汰；但每個人總要食飯，飲食業可以長久做落去。而且，飲食業對於居住喺日本嘅外國人嚟講，門檻亦較為低，對於其實日文未算好流利嘅Henry嚟講都比較容易。然而，佢都坦言做飲食業有辛苦嘅地方：「我喺香港冇做過飲食，好多嘢都要由低做起，成日俾師傅鬧，要放低身段，靠自己努力同意志捱過。」
有危便有機 因疫情反而得到機會
Henry同羅師傅喺疫情之前已經有一齊開舖嘅構思，亦開始搵舖頭，但係日本唔少業主都怕輕信外國人，唔敢租俾一間剛成立嘅公司。咁岩之後撞正2020年疫情開始變得嚴重，喺緊急事態宣言期間，服務業搵食艱難，其中飲食業更加要晚上8點前就收舖，令Henry同羅師傅初時都好卻步。
另一方面，因為疫情，好多人都唔敢租實體舖，甚至唔少店舖索性結業，令到業主大大降低出租門檻。Henry：「冇人知疫情幾時完，點都要行落去。」Henry同羅師傅最後決定租下位於神保町，原是居酒屋嘅一個舖位，附近主要都係打工仔同留學生。就係咁，粵港美食開始咗第一間舖頭，其後有唔少居日香港人或者鍾意香港嘅日本人都因為疫情去唔到香港，而特登過嚟食飯。疫情期間，生意反而越做越好，半年之後就喺神保町另外一個位置開2號店，2022年11月再喺上野開新舖。
粵港美食 菜單多元化
粵港美食嘅名字係由廣東人羅師傅嘅「粵」，香港人Henry嘅「港」，一齊整出嚟嘅「美食」三個元素組合而成。Henry一開頭希望店舖名字簡單一啲，連日本人都可以一睇就明。由於食材限制，喺日本要100%重現香港菜式總有困難，Henry直言唔想消費「香港」二字，但仍然希望盡量做好香港菜、廣東菜，所以粵港美食嘅菜單都一絲不苟，絕對唔會見到平時喺日本中華料理店入面見到嘅餃子同麻婆豆腐。
粵港美食三間舖頭嘅菜單各有招牌菜式，1號店有各樣小炒，2號店出名燒味，上野店則係點心。招牌菜式以外嘅菜單亦十分多元化，上野店就有炸兩、菠蘿包、叉燒酥、蛋撻、艇仔粥等等。而味道方面，亦冇特別迎合日本人口味，Henry：「其實日本人都好食到，唔需要調較。」
100%重現香港廣東菜有難度
香港、廣東菜有好多菜式都工序繁複，唔係人人都有心機肯做，而且對材料、調味亦有講究。例如好多香港人鍾意食嘅雞，喺日本就好難買到新鮮生猛嘅，而且雞種唔同，肉質口感都同香港差天共地。為咗做好一道簡單嘅白切雞，羅師傅就特意搵到最貼近香港人食開嘅「香雞」，佢嘅肉質同脂肪比例最岩用嚟做呢道菜。
除此之外，炸兩望落只係腸粉包住油炸鬼，但係其實又係唔係咁簡單呢？羅師傅就話：「我哋土生土長食嘅野，由細到大嘅飲食文化，北方人唔會識得點做，調味都模仿唔到咁足。」至於叉燒酥，剩係聽到個「酥」字都覺得複雜，再聽羅師傅解釋酥皮要「開酥」，每一層皮要夠凍，牛油要用急凍嘅，先可以做到層次感⋯⋯等等，真係佩服羅師傅就算辛苦都要想做好自己特色嘅呢份堅持。
做好自己 繼續努力
Henry認為做好自己，有口碑就係最好嘅宣傳方法，唔少客人都係熟客或熟客介紹，不斷嚟幫襯，仲會問羅師傅有冇隱藏菜式，亦有熟客會喺2號店2樓食私房菜。對於未來發展，Henry都係咁講：「做好自己現在。我哋唔係大公司，冇好正規嘅訓練，所以或多或少都會有錯漏，會努力改善，盡量做。」
粵港美食 上野店
地址：〒111-0043 東京都台東区上野4-4-5 Dreamers ミトミビル2階
電話：03-5846-8078
營業時間：上午11:30 – 晚上22:00，無休
https://www.cantondishes.com
Facebook: https://www.facebook.com/cantondishes/
Instagram: https://www.instagram.com/cantondishes/
