喺日本搵屋其實係咪真係咁難呢？當年搵屋嘅時候明明已經揀左「外國人OK」嘅單位去問，結果最後被拒絕嘅理由竟然都係「唔想租比外國人」，內心充滿問號？？？問返先知道，原來多數都係之前租比外國人嘅時候出過問題，好多業主同管理公司都會因為咁覺得外國人比較麻煩，而且難溝通，所以就直接拒絕租借比外國人喇。結果問左幾間都NG（No good）…但其實如果有心機同溝通得夠嘅話，要租屋都唔係所講咁難嘅。如果擔心溝通問題，都可以問下有冇識中英文嘅agent，咁就唔使雞同鴨講啦。
有關搵屋嘅基本流程同所需文件，可以參考哩篇新手上路。
①幾時要開始睇定屋？
小編當年係用working visa過嚟，心諗應該會易搵啲，咁啱同事結婚搬去同老公住，所以就借左佢個單位住2個月順手搵屋，但因為係年尾，撞正日本搵屋同搬屋嘅高峰期！！結果差唔多用咗個半月先搞掂。如果人在香港想要一到埗就可以搬到入去住，建議大家要提早3-4個月去搵。日本嘅搵屋旺季為1-3月同9-10月，本身都好多日本人會喺呢段時間搵屋，選擇會相對少啲。
| 租屋月份 | 特徵 |
| 1-3月 | 日本新年度由4月開始，好多人會因為返工返學而搵屋搬屋。房屋供應雖然會增多，但條件較好嘅房可能都會日本人優先。屋租都會比較難調整。 |
| 4-5月 | 因為大多數人會喺3、4月入伙，所以1人房嘅供應會相對較少，另外有5月黃金週假期，查詢會比平時需時。 |
| 6-8月 | 開始較少人會搬屋，比較多時間可以考慮，租金亦有機會降價。但都要留意8月中有大型連休（お盆）。 |
| 9-10月 | 另一個旺季，因為日本公司開始人事調動（転勤），同1-3月一樣競爭可能較大，但如果係想搵一家人住嘅屋，哩個時期反而可能多啲選擇。 |
| 11-12月 | 11月都可以慢慢揀，但到12月中開始條件好嘅房屋會逐漸減少。 |
②搵屋要睇咩條件？
大家搵屋都應該有啲要求，但選擇太多可能會太亂。小編有幾個心得想分享下。首先「築年数（建築年份）」最好搵2000年以後，即築24年以內，因為有1981年制定嘅防震標準+新制定既地質調查，耐震度都會好啲。「建物構造（建築材料）」就建議RC/SRC，對地震冇咩免疫嘅香港人會比較安心，隔音都好啲。
| 材料/特徵 | 防音 | 耐火 | 耐震 |
| RC造/ 鋼筋混凝土構造 | ◎ | ◎ | ○ |
| SRC造/ 鋼骨+鋼筋混凝土構造 | ◎ | ◎ | ◎ |
| S造/ 鋼骨構造 | △ | × | △ |
| W造/ 木造 | × | × | × |
睇「間取り図（平面圖）」嘅時間可以留意①露台大小 ②有冇分隔廚房 ③有冇室內洗衣機位。如果好似下面個露台咁應該曬得好少衫，露台有放冷氣室外機放就會更窄，哩種情況要望望有冇浴室乾燥機可以乾衫。廚房冇分隔而又會係屋企煮野食嘅話，可能會油煙較大，傢俬同衫都會吸味。洗衣機位如果係室外嘅話，太早太夜洗衫可能會被投訴同風吹雨打耗損都會較快。
（網上圖片）
另外想大家要留意嘅就係GAS（香港俗稱「煤氣」，雖然而家冇再用煤都係天然氣為多）！除左標明全電化嘅房屋，多數熱水爐都會用到GAS，而大家一定要睇係咪「都市ガス（大多為天然氣）」，如果係寫「LPガス/プロパンガス（液化石油）」，一律建議避開避開避開！！因為不但要定期加油，未必有得轉provider之外，對換同等天然氣大概要2 倍用量，所以費用都會貴好多！！另外，如果有寫「ガスコンロ対応（可用煤氣爐）」，要睇清楚有冇包爐具，哩種廚房都有機會要用液化石油，同埋要自行買爐。
（網上圖片/日本香港人協會製圖）
對於未係好熟日文嘅人，可能未必睇得明一大堆條件，所以小編都綜合左少少常見嘅用語。
租屋用語解說
| 2 階以上 | 2樓以上｜小編一定會揀2樓以上，特別女仔都建議住高少少 |
| 南向き/ 東南向き | 向南、向東南｜採光比較好，但租金可能會貴少少 |
| TVモニター付インターフォン | 螢幕對講機｜唔駛開門都知係傳銷定送貨 |
| (2 口)コンロ | 爐口｜2口或3口代表個數 |
| IHクッキングヒーター | IH爐｜代表電爐，廚具記得要買返IH可用嘅！ |
| 都市ガス | 都市GAS｜比較多煤氣公司可以選擇 |
| LPガス | 液化石油｜價錢較貴，再重覆一次：最好避開！ |
| エアコン | 有裝冷氣機 |
| オール電化 | 全電化｜只需要交電費 |
| フローリング/ FL | 木地板 |
| クローゼット/ CL | 附有衣櫃｜通常都冇分格或只分上下層 |
| バストイレ別 | 浴室廁所分開 |
| シャワー | 只設淋浴，不設浴缸 |
| 浴室乾燥機 | 浴室有乾衣功能｜浴室可抽濕/暖氣乾衣，唔係乾衣機啊！ |
| 室内洗濯機置場 | 室內設有洗衣機位｜記得一定要度好大細買啱尺寸嘅洗衣機 |
| 敷地内ごみ置き場 | 大廈內設有垃圾房｜扔垃圾會方便啲 |
| バルコニー | 有露台 |
| 宅配ボックス | 有智能櫃｜可以代收網購物品等 |
| エレベーター | 有電梯｜冇嘅話搬屋或者送貨都有機會貴啲 |
| 単身者相談 | 1人入住需查詢｜有啲房屋未必比1個人入住 |
| 二人入居可 | 可2人入住｜未必所有房屋都可以2個人住如為「単身者専用」、「ルームシェア不可」都係准1個人入住 |
| ペット相談 | 養寵物需查詢｜如「ペット可」就可以養，但租金通常都會較貴 |
| 初期費用カード決済可 | 初期費用可以碌卡｜初期費用金額通常較大，要留意限額 |
| 重要事項説明/告知事項あり | 可能有特別規矩或瑕疵，更甚會係凶宅 |
③ 特別留意隱藏收費/規矩
最後簽約前問清楚有冇其他費用，小編當年租屋，即使全程日文溝通，有日籍保證人，但管理公司都要強制加入外國人專用嘅保證公司，final租金同最初講嘅有出入。建議問清楚租金或初期費用有冇包火險、消毒費、換匙費等。仲有續約時嘅「更新費用」同退租嘅還原手續都最好問清楚，避免被追收「還原費」。
搵屋初期可能會好似盲頭烏蠅咁，但睇得樓多就會更清楚自己需求。如超出預算，要清楚自己嘅必須條件同可以讓步嘅地方，咁就會更容易揀到合適嘅屋。