喜愛香港電影 港日夫婦橫須賀茶餐廳：Hong Kong Cafe A Better Tomorrow

平時介紹嘅都係位於東京嘅香港餐廳，今次帶大家離開東京遠赴到橫須賀，介紹呢間由香港人Yukie同日本人阿翔經營嘅香港茶餐廳「Hong Kong Cafe A Better Tomorrow」。

橫須賀唯一香港餐廳

橫須賀位於神奈川縣南東部的三浦半島，由東京站乘電車到橫須賀站需要1小時15分鐘。橫須賀係美國海軍及日本海上自衛隊嘅基地所在地，所以喺呢度可以搵到多國文化。而喺呢度仲俾我哋搵到一間香港茶餐廳「Hong Kong Cafe A Better Tomorrow」。

香港人Yukie同日本人阿翔兩夫婦住咗橫須賀6年，平時都會自己煮吓香港嘢食，見到既然橫須賀有咁多唔同國家菜式嘅餐廳，於是決定將自己都開返一間香港茶餐廳。開舖初時都有唔少客人唔知咩係香港菜，覺得好多都係未食過嘅，就咁睇菜單，沙嗲牛肉、牛腩麵等都未必知道係咩味，就抱住好奇心入嚟食。由於橫須賀嘅多元文化，客人都好易接受新事物，都話香港嘢味道好獨特。

熱愛香港電影及模型槍　

舖頭名稱「A Better Tomorrow」源自香港電影《英雄本色》，係阿翔最鐘意嘅香港電影，而且意思正面，從一開始已經決定要用呢個名開舖。阿翔除咗鍾意香港電影，仲好鍾意模型槍。佢哋會定期喺舖頭附近舉辦模型槍活動，同一班志同道合嘅朋友交流，仲會整活動限定菜式，等大家認識更多香港嘢食。

自肥菜單 鍾意食就整

「A Better Tomorrow」嘅菜單有好多都係香港人平時都好鍾意食嘅嘢。豉油王炒麵、乾炒牛河、菠蘿油、酥皮蛋撻等。問到兩位點決定菜式時，Yukie就話：「我都係自己想食咩就整咩。」佢哋仲會自創菜式，例如叉雞加冷麵。夏天就會有夏日限定嘅紅豆冰同楊枝甘露。有時會收到客人Order要食牛腩麵，佢哋都會盡量做。而喺日本比較難整嘅就係海鮮，有啲海鮮需要特別買入，但又要保持新鮮，一次唔可以買太多，所以佢哋只能限定做。菠蘿油則發酵步驟複雜，每日只售5個。

難忘每一位客人

阿翔話每一位客人佢都會記得好清楚，佢認為每一位客人都有自己嘅故事，每次同客人傾偈都係一個特別嘅回憶。更有客人係每星期都由東京專程過嚟，令佢哋好感恩。Yukie同阿翔希望香港人可以勿忘初衷，香港人加油。而日本人更要珍惜現在擁有嘅自由。如果同樣鍾意香港，鍾意香港電影，記得要嚟橫須賀「Hong Kong Cafe A Better Tomorrow」搵佢哋食住飯傾偈。