嚟到3月，又到咗搬屋嘅旺季喇！
喺大家落力將各種用品pack箱嘅時候，有冇諗過而家好使好用嘅電器有可能去到新地方就唔用得呢？
其實成個日本嘅電器效率係分為東西兩邊，所以如果你係由東日本搬去西日本，或者調返轉由西日本搬去東日本，就真係有可能用唔到某啲嘅電器，而家一齊睇吓下面嘅詳情啦！
東日本 VS 西日本
相信好多人聽過東日本同西日本嘅文化同環境有一定差異，而當中電器頻率就係其中一樣。
東日本係50Hz，而西日本就係60Hz，而靜岡縣同新潟縣直情係縣內都有細分：靜岡縣以富士川為界，新潟縣以糸魚川為界，兩邊嘅電器頻率都唔同。
之所以會有呢個東西之別，係因為日本開始用電氣嘅時候係明治時期，當時嘅日本係從外國進口發電機嘅。東京使用嘅係50Hz的德國製產品，而大阪使用嘅就係60Hz嘅美國製產品，就係咁樣，日本嘅電器頻率就隨之分咗兩邊。之後呢100年，其實都談論過好多次點樣統一電器頻率，但結果都係未有定案，就咁留下咗一個歷史問題。
如果家就嚟搬屋，可以睇睇下面呢個表，確認一下自己嘅現居地同新住所分別係邊個頻率。
電器頻率有咩影響？
電器頻率唔同，最主要嘅影響就係有部分電器可能會用唔到，例如微波爐、洗衣機、乾衣機等等。用唔到都事小，強行啟動可能會直接整壞件電器，甚至引起火災，所以一定要注意呀！
另外，有啲電器可能都用到，但性能同消耗嘅電力會受到影響，例如雪櫃、風筒、風扇等等。雖然話可以用到，但就未必用得咁就手喇。
不過當然，亦都有啲電器一般係不受影響嘅，例如電視、吸塵機、電腦等等。
邊啲電器兩邊都用到，邊啲唔得，其實都可以直接喺電器上嘅機身、招紙或說明書上睇到。如果一早有計劃要西搬東或東搬西嘅話，買電器嘅時候可以盡量搵ヘルツフリー或者寫住兩者通用嘅電器。例如筆者呢部焗爐寫住「50H-60Hz共用」，就係東西兩邊都用得喇。
如果真係搵勻晒都搵唔到你嘅電器係邊個頻率，都可以去生產商嘅官網睇返，又或者直接去信問生產商。
電器已經係生活不可劃缺嘅一部分，如果搬到新屋先發現用唔到，就真係揦手唔成勢喇，所以一定要記得check清楚先。如果真係唔啱頻率，就唔好勉強帶去新屋喇，快快手賣咗佢或送俾有需要嘅人，之後去到新屋再買返適合嘅電器啦！