一齊沖返杯屬於香港嘅味道
對香港人嚟講，港式奶茶唔只係一杯飲品。
無論係早餐配個菠蘿包、放工去茶餐廳坐低抖一抖，定係同朋友吹水，一杯香濃幼滑嘅港式奶茶，都承載住好多屬於香港人嘅共同回憶。
港式奶茶製作技藝已列入香港非物質文化遺產代表作名錄。
而一杯真正嘅港式奶茶，背後一啲都唔簡單。
茶底要按獨特比例拼配，再配合香港傳統「撞茶」沖泡技巧，加上香濃淡奶，先沖得出層次豐富、茶香濃郁而入口順滑嘅港式奶茶。
今次，日本香港人協會誠邀大家一齊到 SoSweet，由經驗導師帶領，親手沖製一杯真正嘅港式奶茶，了解香港奶茶背後嘅文化同故事。
無論你係想重溫熟悉嘅香港味道，定係一直想學識點樣自己沖一杯正宗港式奶茶，都歡迎一齊參加。
工作坊內容
- 認識港式奶茶文化及歷史
- 學習香港傳統沖奶茶技巧
- 親手沖製港式奶茶
- 品嚐及交流
參加者仲可以帶走自己親手沖製嘅港式奶茶，拎走慢慢歎！
工作坊將以廣東話進行，並安排日語傳譯，方便香港朋友同日本朋友一齊參與。
期待同大家一齊，沖返杯屬於香港嘅味道。
活動詳情
日期：2026年7月26日（日）
時間：14:30-17:00（14:15點名）
地點：SoSweet
〒558-0023 大阪府大阪市住吉区山之内３丁目８−３０ 杉本町グランドハイツ １F
名額：6人
語言：廣東話（附日語傳譯）
費用
¥3800（非會員）
¥3300（會員）
注意事項
- 活動人數設有上限，額滿即止，請密切留意最新消息。
- 確認需時，如實際報名人數超過每一節預設上限，本會將盡快以電郵通知並安排相關退款。
- 活動期間所拍攝的照片，日後有可能用於事後報告及宣傳之用，敬請原諒。如有問題，請告知在場工作人員。
- 如參加者因個人理由而早退、遲到或缺席，已確認之報名費用皆不會獲得退款，敬請原諒。
- 如活動因天氣、自然災害、事故等而取消，本會將退回已確認之報名參加費用。
- 每位參加者可帶走約 1.5 公升自己親手沖製嘅港式奶茶。SoSweet 將提供外帶樽，亦歡迎自備水樽或容器。
- 由於工作坊需要沖泡茶葉，為防弄污衣物，建議自備圍裙。
報名方法
填寫以下報名表格，並透過Stripe以信用卡支付參加費用。
如要使用會員優惠，優惠碼將以電郵方式通知各會員，請在付款時填寫。
如未有使用優惠碼，將當作不使用會員優惠，本會將不會退回優惠金額。
※有關會員登記：https://jphker.org/membership/registration/
會員優先報名：2026年7月6日-7月9日
一般報名：2026年7月10日-7月24日