係朱古力！
係日本囡囡送嘅朱古力！
咪咁興奮住，睇下你收到嘅係咪「義理朱古力」先講⋯⋯
咩叫「義理」呢？根據字典有好幾種解釋，套落情人節呢單嘢黎講，「義理」可以解做「為咗維持人際關係而不得不做某啲嘢（就算你本身唔太想做）」。
講到呢度，相信聰明嘅你已經諗到點翻譯佢做廣東話啦，無錯，「義理」即係「俾面」。
日本嘅情人節係一個由女仔做主動，送朱古力俾男仔嘅節日。本身就好簡單，個女仔睇中邊個男仔，咪送朱古力俾佢囉。但喺重視人際關係嘅日本社會，呢件事就變得愈黎愈複雜。
「唔送俾佢，佢會唔會覺得好無面然後嬲咗我？」
「其實佢平日都對我幾好丫，係咪應該送返舊朱古力慰藉下佢？」
於是，朱古力就開始分為告白用嘅「本命朱古力」同埋俾面用嘅「義理朱古力」喇！所以如果情人節收到心儀對象嘅義理朱古力，基本上同收到好人咭無分別…….
嗯……好人咭呢啲咁唔老黎嘅話題，我哋都係唔好再講落去。不如黎問下第二個問題：「點分自己收到嘅朱古力係邊種？」
一般黎講，可以咁分：
本命朱古力：貴嘢或者手作，盒朱古力入面有咭仔，個女仔特登黎搵你送俾你
義理朱古力：平價嘢，無特別包裝，一包有好多舊而你分到其中一舊
（圖片來自購物網站AMAZON）
不過就算咁都係好難分，連負責送嘅女仔都覺得難。有女網友試過送「義理朱古力」俾人，但可能個包裝太靚，個男仔誤會咗係「本命朱古力」，事後走咗黎同佢表白……又有人試過本身想送「本命朱古力」但又手勢差唔識整，結果對方以為收到嘅只係俾面朱古力……
真係聽到都覺得麻煩。
前排就有日本雜誌做咗個調查，訪問咗300個日本在職女性，結果認為「義理朱古力文化」唔應該再有嘅比率高達42.3%（認為應該繼續落去嘅只有13%），睇得出日本女仔其實唔太想搞呢啲麻煩嘢。
到底黎緊「義理朱古力」會唔會走入歷史呢？到佢真係要消失嗰時，又會唔會有人走出黎保育佢呢？就等我哋拭目以待。
Btw，其實收到「義理朱古力」，又有咩好驚喎！希望在明天丫嘛！
日本香港人協會編輯部