途經伊勢丹百貨，穿過繁華街道，嚟到新宿二丁目一間酒吧前面。採訪當日係星期一下午，成條酒吧街靜英英，淨係聽到兩隻貓慵懶嘅喵聲。
「喂，Google Map話喺呢到喎，唔見嘅？」負責影相嘅朋友同我左望右望，覺得迷惘疑惑嘅時侯，眼前道門突然打開。
老闆：「香港人ですか？」(係咪香港人呀？)
門入面，唔止係老闆微笑嘅雙眼，仲收埋咗一個小小嘅香港。
點解揀雞蛋仔？ 因為夠香港。
坐低寒喧幾句、自我介紹過後，老板遞上一張餐牌。
餐牌英日雙語，帶點設計感，菜式有雞蛋仔、格仔餅、港式奶茶、檸茶……
仲研究緊食抹茶定榴槤味雞蛋仔好嘅時候，「渣——」
一陣熟悉嘅香氣傳來，原來老板已經整緊底原味俾我哋！
老板靈活咁轉個身，拎咗兩盒維他奶出嚟，「麥精定原味？」
一路飲住包麥精，開始同老闆傾下偈。
老闆喜愛日本文化，曾經一年飛七次日本，一有假期就坐凌晨機嚟日本玩。後來嚟埋日本留學，到畢業時因為想留喺日本，所以決定開舖。問老闆點解會揀賣雞蛋仔，佢諗都無諗就答：「因為夠香港。」
一講起香港美食，唔少人會諗起蛋撻同埋點心，但係老闆認為前者喺源自英國，後者來自廣州。
而雞蛋仔，係真正源自香港，屬於香港人嘅美食。
雞蛋仔在日本
雞蛋仔材料簡單，老闆話要重現香港味道，其實唔難。不過令佢無奈嘅係，重現咗香港味道，細心用風筒吹到外皮脆卜卜，日本人卻唔識得欣賞。
日本人注重衛生同禮儀，除咗喺祭典同埋寥寥可數嘅幾條美食街之外，甚少會見到日本人喺街食嘢。雞蛋仔都唔例外，對日本人嚟講，雞蛋仔並唔係「即整即食」嘅街頭美食，而係放入盒度拎到返屋企先食嘅takeaway，由其肺炎之下，幾乎個個都外賣自取。老闆目擊過唔少客人將底雞蛋仔一嘢塞落袋，佢心痛啲雞蛋仔碎晒之餘，都擔心客人拎到返屋企淋晒唔好食。
問老闆會唔會就返啲日本客，將底雞蛋仔整到適合拎到返屋企先食，老闆就話：「想保留香港風味，唔想就晒啲客。」與其改良雞蛋仔去遷就日本人嘅習慣，更加想令日本人理解香港嘅「掃街文化」。
但生意歸生意，喺日本賣雞蛋仔，為咗吸引客人入舖坐底，少不免要加啲花臣，例如雪糕呀彩糖呀咁，老闆直言心情複雜：「都幾想日本人知道，雞蛋仔唔加嚿雪糕上去都好好味㗎。」簡單就是美，老闆希望終有一日，可以用原味雞蛋仔吸引日本人。
香濃奶茶，竟然嚇親日本人？
兩、三年前，台灣嘅珍珠奶茶喺日本爆紅。作為奶茶同盟一員，都有多少帶挈到港式奶茶，但老闆覺得日本人始終對香港文化認識唔多。
日本人經過珍珠奶茶嘅「薰陶」之後，對奶茶嘅認識都係偏甜，同埋奶味重。相反，港式奶茶茶味重、帶獨特香味，口感亦同台式奶茶有分別。老闆話，直頭有日本客飲完港式奶茶之後問：「呢杯咩嚟㗎！？」
初時單賣奶茶無人問津，老闆話為咗生意有試過加入珍珠、黑糖之類，但現今珍珠奶茶熱潮已過，索性回歸基本步，賣返純港式嘅奶茶。
繼續推廣香港美食
老闆原本物色緊新舖位，但撞正疫情，唯有暫緩計劃。經朋友介紹下，喺現時嘅小酒吧落腳，以做外賣為主。講到今後嘅計劃，老闆希望喺日本各地開分店，推廣香港美食。除咗雞蛋仔之外，老闆亦有計劃喺網上賣冰皮月餅同埋奶茶雪糕，慢慢發展下唔同產品。
如果各位路經新宿，或者出開附近，都不妨叫返底外賣雞蛋仔，或者去搵老闆飲杯奶茶吹下水。
Café Stanley
地址：東京新宿二丁目18番10
營業時間：逢星期六、日 13:00-18:00
UberEats FoodPanda Wolt Menu
*頭盔：疫情仍未平息，請避免不必要的外出，做足防疫措施，保障自身安全。