「お盆」（廣東話音讀：哦幫）其實意指「盂蘭盆會」，即係大家久唔久會喺香港啲球場度見到嘅「盂蘭勝會」，其起源被認為同「目連傳說」有關。
相傳佛祖有個叫目連嘅弟子，有一日佢利用神通力，見到自己死咗嘅媽媽喺餓鬼道受苦，於是走去問佛祖可以點做先救到媽媽。
「中狀元救老母，時間啱啱好。」
……佛祖並唔係梁朝偉，當然無咁講。佛祖俾出嘅建議係：「於七月十五日，以百味五果置於盆中，供養所有比丘（即僧人）。如是者，目連媽媽就可以沾到功德，得到救濟。」咁話晒都係佛祖親自提出嘅idea，目連聽完就梗係爽手照做。搞掂之後，目連果然唔駛中狀元都救到老母，令目連媽媽成功脫離餓鬼道。
「目連傳說」當中提到嘅「七月十五」、「供養」、「死後世界」等等，及後都成為咗「お盆」嘅重要元素。
喺日本，最早於飛鳥時代已經有「お盆」嘅相關記錄，但去到江戶時代「お盆」先變得普及。嚟到現代日本，「お盆」已經變成拜祭祖先嘅傳統節日，係僅次於新年嘅重要日子。
「お盆」本身係農曆七月十五，但明治維新之後政府改用西曆，除咗沖縄・奄美地區之外，大部份地區嘅「お盆」都隨之跟返西曆。官方所定嘅「お盆」公眾假期係八月十三至十六日，連同星期日等公眾假期，有機會放大約一個禮拜假，大家一般會趁機返鄉下探親同拜山。
傳統上，日本人除咗會喺「お盆」期間拜山，仲會喺「お盆」開始同埋結束嗰日（即十三日同埋十六日）都會於門口用器皿點火，用以迎接及送走祖先嘅靈魂，有啲地區甚至會有地方政府或團體搞比較大型嘅點火大會。
「お盆」期間大家亦會將屋企嘅佛堂打掃乾淨，同埋準備一個叫「精靈棚」嘅小棚架，用嚟放置各類祭品。而「精靈棚」上，最吸引眼球嘅相信係名為「精靈馬」及「精靈牛」嘅擺設。
上圖用青瓜加筷子造成嘅係「精靈馬」，用嚟俾祖先嘅靈魂快馬加鞭，騎返屋企。而用茄子加筷子造嘅係「精靈牛」，用嚟俾祖先慢慢地騎返淨土。By the way，お盆完咗後係唔可以食返啲青瓜同茄子，通常會埋喺地下或者用鹽清理過後用紙包好再揼咗佢。
另一個「お盆」期間嘅知名習俗係「盆踊」(「踊」即跳舞）。原本「盆踊」係「お盆」法事嘅其中一環，居民會以邊誦經邊跳舞嘅形式去迎接先祖亡靈。嚟到現代社會，「盆踊」嘅祭祀色彩大大減少，變成一種代表夏天嘅合家歡開心活動，唔少地方都有以「盆踊」為主題嘅表演同活動，好鬼熱鬧。
今屆奧運閉幕禮，官方都有準備跳 「盆踊」嘅環節，仲邀請埋選手一齊跳， 想話炒熱氣氛咁，當然成唔成功就見人見智啦……
講開又講，呢種宗教活動「去宗教化」嘅現象，都可以話係近代日本嘅特色，有機會我哋再詳細探討下。