【廣東歌系列】ー 一首畀日本災民嘅歌

二零二四年一月一號日本時間下午四點零六分，正當全世界仲喺度慶祝緊新一年嘅來臨，天災無情，喺毫無預兆之下，石川縣（sek6 chyun1 yun6）發生7.6級強烈地震。附近地區，例如富山（fu3 saan1）同新潟（san1 sik1）等多個地方，都錄得唔同程度嘅地震，氣象廳亦喺隨後發出海嘯警報。至今（一月十一號）造成206人罹難，567人受傷；房屋倒塌、財物損失，不計其數……

嚟咗日本幾年，每年新年都會去東京調布市嘅深大寺初拜，祈求屋企人健健康康，新一年無風無浪。今年都唔例外，但因為前一晚倒數（dou3 sou2）玩得太夜，瞓晏咗（fan3 aan3 jo2），所以最後三點半先去到。入到去寺廟參拜完，同元三大師講完自己今年嘅新年願望，就去咗求籤（kau4 chim1） — 「意趣無船渡，波深必誤身」…好一句無船渡，又再一年告誡典型嘅香港人，做事唔好操之過急（chou1 ji1 gwo3 gap1）… 帶住少少失望，將凶籤掛咗喺樹枝上，又買咗個護身符（wu6 san1 fu4）解除厄運，正諗住行去車站搭車返屋企嘅時候，大家嘅手機都突然響起警報，聽到從石川縣傳嚟嘅地震噩耗⋯⋯

雖然東京相距震源有成278公里咁遠，但係成程車（sing4 ching4 che1）不斷都聽到巴士車廂入面嘅廣播，用一把嚴肅而又帶有緊張感嘅聲音，通知大家可能即將會有海嘯，呼籲所有人盡快避難…坐喺我隔離嘅一對小情侶聽到廣播，不停互相同對方講：「やばいね ！」（好大鑊吓喎 hou2 daai6 wok6 ha5 wo3）然後佢哋又攞咗部手機出嚟，喺到查石川新潟發生嘅海嘯影片。睇住啲海水湧入馬路，再湧入民居；內心有少少心悒（sam1 ap1），腦海入面不自覺咁浮現咗當日放學返到屋企，喺電視機度見到311嘅嗰一幕同嗰種震撼⋯⋯

第二個鄉下：日本

惻隱之心，人皆有之。無人會想見到其他人受傷，或者經歷痛苦。但係唔能夠否認嘅係，香港人（※ 或者可能係我身邊嘅香港人朋友）對於日本遇到嘅災難，通常感受都會嚟得切膚一啲，肉痛一啲，表現得更加關心一啲。喺社交媒體到見到日本嘅天災消息，下面通常都會有好多人打「天佑日本」「日本加油」等等嘅打氣留言。大家都好想同日本講，喺遠處嘅香港都有好多人關心你哋，支持你哋，想你哋可以堅強咁渡過難關。

近年天災人禍頻繁發生，好似烏俄戰爭同以巴衝突呢啲涉及人道危機嘅大事，每個人見到個心都會戚住戚住；但係除咗呢啲大事之外，並唔係人人對住所以嘅災難，都可以表現出相同嘅關心以及係同等嘅同情。就好似十二月頭喺某個地方都發生咗大規模嘅天災，但係喺網絡上（※ 至少喺小編我嘅互聯網世界到），網民嘅關心度無咁高，留言亦都無咁有溫度。所有災民都係值得支持同鼓勵嘅，喺呢度唔係想比較邊個痛苦啲，邊個值得幫多啲；而係想同大家一齊反思一下。「有人」講過：「世上冇無緣無故嘅愛。」咁點解香港人會鍾意日本，會叫日本做繼香港之後第二個鄉下呢？有機會嘅下次介紹一隻同日本有關嘅香港歌，再同大家講下呢個話題~

天災無情，人間有愛

喺過去嘅一個幾星期，世界各地都主動為石川縣能登地區嘅災民籌款同埋籌措物資；但係直到現時為止，都仲有好多災民活喺水深火熱之中，生活環境極為惡劣。真係好希望各界嘅善長人翁（sin6 jeung2 yan4 yung1）可以慷慨解囊（hong2 koi3 gaai2 nong4），為佢哋提供多一啲嘅援助，早一日重建自己嘅屋企。

今次搵到一首喺十三年前，香港送畀311災民嘅一首歌嚟介紹畀大家。呢首歌嘅歌詞係源自日本昭和時代著名詩人及兒童文學家 宫沢賢治 嘅《雨ニモマケズ》，希望大家可以多一啲正能量，多一啲溫暖。喺傷痛中堅持落去，衝出逆境！

• 難度：☆☆☆☆☆
• 陀地程度：☆☆☆☆☆

・歌曲及歌詞之版權，皆屬於該唱片發行公司所有，本網誌僅作為廣東話學習之用。
・本網誌是以廣東話教學為目的，並非純粹歌曲分享，如果喜歡，請務必購買原版。
・所有歌曲只限在本網誌學習，本網誌不提供載點，也請勿利用其他工具下載。

上期答案（【廣東歌系列】ー 一首關於奶茶嘅歌）

1．喺呢首歌入面，你搵到有幾多個語氣詞呢？你又知唔知道係咩意思同點用呀？
この歌の中で、あなたはいくつの語気詞を見つけましたか？また、それらの意味と使い方を知っていますか？

2．喺呢首歌入面出現過嘅以下幾個詞語係點解呢？
この歌の中で現れた以下の言葉やフレーズは何の意味ですか？