淺草嘅地道香港料理
淺草,富有人情味嘅下町,係國內外遊客必到嘅旅遊熱點,同時亦係當區居民嘅「大衆食堂」。遠離淺草寺附近最旺嘅區域,喺住宅區有間相當低調嘅香港餐廳。「火炎 香港創作料理」由老闆鄧日成(成哥) 主理,訪問當日正值火炎重新開業之前,而成哥喺舖頭作開店嘅最後準備。
同好多香港人一樣,成哥都係透過漫畫同電子遊戲認識日本文化,二十六歲嗰年更帶住熱誠同衝勁嚟日本學整麵包。喺做麵包學徒期間,試過喺酒店做西餐,但成哥發現當時東京並冇正宗嘅香港料理,要自己煮先食得返熟悉嘅味道。於是,成哥參考網上書籍同食譜,自學中菜並不斷磨練,把心一橫自己開舖重現真正嘅香港味道。而改名叫「火炎」,係因為老闆相信店鋪個名有火嘅元素會帶旺店鋪嘅生意。
勇於創新 堅持自己
開業三年,火炎一開始嘅定位係炒飯專門店,但店名嘅創作料理亦為成哥保留彈性,鑽研新菜式:「為咗保持新鮮感,咪整下啲新嘢,令到自己有個動力呀嘛」。火炎嘅Facebook專頁亦時不時見到成哥上傳餐牌以外嘅菜式。然而,成哥嘅創作料理路並不平坦。
唔少日本人對於中菜仲係停留喺日本中華料理嘅固有印象,試過將新開發嘅菜式以配菜小碟比日本客人試食,但反應冷淡,亦改過幾次菜單嘗試接觸唔同客群。最後成哥決定忠於自己,菜單每一道餸都經過精挑細選。如今,餐廳嘅食物亦得到各方客人賞識,由最初嘅台灣客,到有香港客發掘到舖頭,再到有唔少日本嘅香港迷專程到訪,口碑慢慢一路傳開去。
鹹魚雞粒炒飯:炒飯乾身,香口惹味。落鑊爆香啲鹹魚嘅時候,店內外都聞到鹹魚香,聞到都流晒口水。除咗食到鹹魚嘅陣陣鹹香之餘,仲食到幼細嘅薑粒,配搭清新。
香菇蒸滑雞:冬菇香滑,雞嘅火候掌握得啱啱好,保持嫩滑多汁,啲精華流落啲汁到,用嚟送飯一流。
乾炒牛河:色香味俱全,有鑊氣。牛肉嫩滑,河粉色澤亮麗均衡,一夾落去層次分明,一條條唔會黐埋一齊,但乾身唔油,碟底冇多餘油份,要事前將河粉逐條逐條拉返開去並炒得鬆散先做到咁嘅效果。
茉莉花茶荔枝雪糕:老闆自創甜品,茶味濃郁,隱隱帶有嘅荔枝甜味。
磨態度 練技術
被問到還原香港味道嘅困難之處,成哥透露唔同菜式都要平衡工序及成本問題。以外型精緻嘅蝦餃為例,材料雖然簡單,但技巧複雜。蒸完出嚟晶瑩剔透嘅蝦餃皮,講求澄麵、生粉同水之間嘅比例,但係香港同日本唔同牌子嘅澄麵之間都會有差別,需要不斷嘗試同調整先搵到最精確嘅比例。而「拍」蝦餃皮到「執」皮成蝦餃嘅形狀,亦需要日復日嘅練習,慢慢累積經驗先至會熟能生巧。成哥亦經過一年半載嘅反覆嘗試先有而家嘅出品,當中嘅堅持實在令人敬佩。
另外,成哥表示日本人相對著重食物嘅外觀:「一定要從外表入手先」,因此喺配料同擺碟上有花心思去作出輕微改動,但味道上絕唔會迎合日本人嘅大眾口味:「初頭我喺依方面落咗好多工夫,咪改佢囉,點可以改到唔偏離香港人口味,同時又唔會令日本人覺得太陌生」。
疫情底下,唔少人選擇遙距工作,減少外出消費,首當其衝當然係飲食業。火炎並唔例外,疫情令餐廳失去喺附近工作嘅日本人生意,亦導致火炎休業一年半。休業期間,成哥並冇放慢手腳,而為求精益求精,日夜不停磨練自己嘅廚藝技術,希望重新開業後客人可以食到佢最好嘅手藝。如今重新開業,成哥表示希望未來會有更多日本人欣賞香港料理嘅滋味。