行富士山

又到咗炎熱翳焗嘅7月，如果呢個時候喺香港約人行山，相信十個有八個都會諗你係咪傻咗，香港夏天又熱又成日落雨，點行呀…. 但如果你喺日本就唔同講法啦。可能大部份人都會諗起行富士山。

富士山高度有3,776米，為日本最高山峰(劍峰)。佢嘅形態優美，甚有詩意，喺日本文學、藝術裏面經常被記載，當中就以日本浮世繪畫家葛飾北齋所畫嘅《冨嶽三十六景》最為聞名。而日常生活中亦不乏佢嘅踪影，例如現行流通嘅一千円紙幣、同埋電話emoji 都會見到佢架🗻。

富士山流傳住唔少嘅民間傳說，係一座充滿神話色彩，極具魅力嘅聖山。例如有日本家喻戶曉嘅輝夜姫喺山上燒燬長生不死藥呀，重有連秦始皇都派人去搵長生不老藥，甚至因此有傳呢座「不死山」(ふじ= 不死) 就係富士山名字嘅由來。

由於富士山屢次發生火山爆發，自古以嚟就被認為係神明嘅居所嘅地方。為咗平息「怒火」，古人就喺山腳起咗淺間神社供奉山神。而早期登上富士山嘅主要原因都係以宗教活動為主，例如喺平安時代有修驗道嘅修行者會以爬富士山為修練。而去到江戶時代，行富士山開始喺民間興起，出現以崇拜富士山同山神嘅民間信仰團體 「富士講」。到咗依家，富士山對日本人嚟講已經唔單止係修練場或者參拜山神嘅地方，而係成為大眾所喜愛嘅日本象徵，每年重會由世界各地吸引到大約30萬登山愛好者拜訪。

現時富士山主要有四條路徑上山，分別係位於山梨縣嘅吉田路線、位於静岡縣嘅須走路線、御殿場路線同富士宮路線。由於吉田路線嘅登山口（五合目）距離山頂較近，因此登山人數最多，其次富士宮路線亦相對較短，兩條路線都較適合新手。而御殿場路線則較長，海拔差異大，而且途中休息站少，要有豐富經驗同足夠體力嘅人士先好考慮選擇嘅路線。普通人由五合目上山頂大約要用7至10個鐘頭，落山就要約3到5個鐘。另外位於山頂有一條路徑叫做缽巡，係指圍繞山頂火山口一圈嘅步道，完成時間大約需要40分鐘。

交通方面，人們主要會選擇乘搭JR、私鐡到登山口最近嘅車站，然後再坐登山巴士到登山口，又或者預約高速巴士直接由關東主要車站直逹登山口。今年7月1號開始吉田路線已經開放，而另外三條路線就將會喺7月10號開始開放。所以依家開始已經可以搵到好多相關Tour 同高速巴士嘅資料同埋開始可以預約啦。

日本嘅春、秋同冬季都會有高空急流 (Jet Stream) 喺日本附近經過，呢段時間嘅富士山經常會有可以將成個人吹起嘅強風，即使有豐富經驗嘅行山客同滑雪高手都好容易發生意外。因此富士山喺相對無咁危險嘅夏季先會開山，確保大家可以喺一個相對安全嘅環境行山。雖然夏季嘅日本大部份時間都被太平洋高氣壓 (Pacific High) 所覆蓋，富士山上弱風嘅日子變多，但山上嘅天氣變幻莫測 ，無人可以保證百份之百安全。即使喺夏天，山上同地面嘅溫差可以相距20度，如果有興趣上山嘅朋友就一定要有充足同適當嘅裝備，從而減低出現低溫症，患上高山症等風險 (詳情應向專業人士了解)。

如果唔鍾意行山或者係擔心自己上唔到富士山嘅朋友都唔緊要，透過參觀富士山世界遺產中心或者由附近遠眺 (例如河口湖)，相信都會理解點解日本人會咁鐘意富士山。如果呢個夏天去唔到富士山亦都唔緊要，因為日本有各種各樣以此為主題嘅商品，買返件可愛嘅商品擺喺屋企，咁即使遠在香港都可以感受到富士山嘅魅力啦!