唔少香港人睇日本動畫同劇集嘅時候,都好嚮往主角住嘅獨立屋。其實日本除咗獨立屋之外,仲有好多唔同類型嘅住宅,今次就為大家簡單介紹一下。日本嘅住宅一般可以分為兩大種類,分別係一戶建同集合住宅。
一戶建
一戶建意思即係香港所講嘅獨立洋房。根據自己嘅預算同埋鍾意嘅地區去尋找地皮,購買地皮後,建築公司會按照業主嘅預算同喜好,設計獨立屋嘅外觀、室內間隔以及選擇裝修用料。缺點係同建築師商討設計都用唔少時間,再加上建築需時遲啲先入住到。
如果覺得要自己諗點設計間屋太煩,業主其實都可以直接購買建築公司預先設計嘅全新獨立屋,或者喺二手市場購買現成嘅獨立屋。不過,如果直接同建築公司購買嘅話,土地同建築物本身係會分開嚟計算嘅,買之前記得要留意一下個價錢呀!
集合住宅
而常見嘅集合住宅大概有五大種類,分別係 アパート (Apartment) , マンション (Mansion) , タワーマンション (Tower mansion) ,団地 (團地) 同埋 寮 (宿舍)。今次除咗宿舍之外,其他四大類別都會為大家簡單介紹一下。
アパート (Apartment) &マンション (Mansion)
香港人嚟日本工作或者讀書,大部份人都會居住喺 アパート (Apartment) 或者 マンション (Mansion)。係法律上,アパート同マンション之間係無明確嘅定義同區分嘅。任由地產公司同業主自行定義,究竟建築物係屬於アパート (Apartment) 定係 マンション (Mansion)。同埋,唔同地產公司對於 アパート (Apartment) 同 マンション (Mansion) 亦會有唔同嘅定義。
而根據國土交通省嘅調查,マンション (Mansion) 通常會有以下幾樣特徵。
- 3層或以上
- 整棟建築物不是由同一個人擁有
- 使用鋼筋混凝土興建
簡單嚟講,アパート (Apartment) 通常會係木造建築,所以隔音同埋防震效能比較差,租金或者樓價都會比較平。相反,マンション (Mansion) 通常係使用鋼筋混凝土興建隔音同埋防震效能比較好,租金、樓價同管理費比較貴。
另外マンション (Mansion) 層數會比較多,住喺較高樓層嘅話,景色會比アパート (Apartment) 好。
除咗普通嘅マンション (Mansion) 之外,仲有一種叫做 タワーマンション (Tower Mansion)。定義係,高度超過60米並且至少有20層嘅住宅,類似香港一般大型屋苑。通常保安比較嚴密,同埋會有會所設施。另外,因為日本治安比較好,一般嘅情況下都只會得 タワーマンション (Tower Mansion) 先會有24小時保安員駐守門口。
団地 (團地)
団地 (團地) 類似於香港嘅公屋。喺第二次世界大戰 (1945年) 之後,為咗解決房屋不足嘅問題,日本開始興建大量団地 (團地) 。不過,大約喺昭和50年 (1970年代中) 開始,日本出生率逐漸下降,再加上仔女被派到其他城市工作同成家立室搬走,喺團地居住嘅小朋友同年輕人越嚟越少,變相只剩返老人家留喺度居住。而近年,団地 (團地) 空置率亦有上升嘅趨勢。為咗吸引啱啱出嚟社會工作,收入較低嘅人或者新婚夫婦入住,團地嘅管理公司會配合年輕人嘅日常生活需求而翻新室內裝修。日本一般租屋唔會包電器同傢俬,有部份團地嘅管理公司為咗更加容易吸引租客更會包埋傢俬同電器。
日本住宅同香港住宅之間仲有好多唔同嘅地方,但係因為篇幅有限,今次就先為大家介紹以上兩大種類嘅日本住宅。如果有打算移居日本或者投資日本物業嘅話,就要好好留意兩者之間唔同嘅地方啦!