踏入年尾，冬天係釀造美味日本酒嘅最佳時期。隨住新酒相繼釀成，酒藏亦會換上新嘅杉玉，通知左鄰右里購買酒藏最新鮮嘅日本酒。近年，愈嚟愈多香港人鍾意飲日本酒，對日本酒嘅認識亦有所提高，但如果想更進一步，欣賞多啲清酒嘅魅力，咁就一定要去酒藏參觀喇！
酒藏探訪大致上分為三種模式：
- 蔵見学 (參觀酒藏)
- 蔵開き・蔵まつり (酒藏開放日・祭典)
- 清酒資料館/博物館
蔵見学 (參觀酒藏)
酒藏普遍都會接受外來人仕嘅預約，深入酒藏內部唔同嘅釀酒場所參觀。一路上，職員會講解有關品牌嘅歷史，如果有任何關於釀造清酒嘅問題，大家亦可以向職員詢問。一邊近距離望到唔同釀酒嘅機器同實物，一邊了解更多釀酒嘅日常運作，實在係一種好難得嘅體驗。除此之外，酒藏嘅建築物同樣極具特色。雖然有好多酒藏已經換上現代化嘅廠房，但其中仍然有為數不少嘅酒藏係經過上百年歷史嘅建築物，頗具歷史價值。唔少更加係彌足珍貴嘅「登録有形文化財」（物質文化遺產），去到嘅時候不妨參觀多幾間唔同嘅酒藏，比較下有咩唔同。
一年四季唔同時間前往酒藏，都可以體驗到唔同嘅樣貌。11月到3月為釀酒時節，參觀途中會見到酒藏員工努力釀酒嘅過程，但同時亦正正因為係酒藏最繁忙嘅時期，有啲酒藏會專注於釀酒嘅業務，而安排唔到人手去帶大家參觀。相反，其餘月份因為比較清閒，所以預約起上嚟比較方便，但係就難啲見到同釀酒有關嘅景象喇。任何人只要對清酒有興趣嘅話，其實冇需要係業內人士都可以參觀，所以大家千祈唔好錯過喇。
（攝於千葉縣酒々井町 飯沼本家）
左邊為舊式「佐瀬式」酒槽，右邊為新式「薮田式」酒槽，將酒液分離後會剩下酒粕。
（攝於千葉縣酒々井町 飯沼本家）
蔵開き・蔵まつり (酒藏開放日・祭典)
酒藏開放日為酒藏嘅特別日子，通常係喺新酒釀成時先會舉辦。由於有啲酒藏平時係唔會對外開放嘅，所以一年只會舉辦一兩次開放日，同一直支持嘅顧客，分享新酒嘅喜悅。酒藏嘅杜氏（首席釀酒師，負責監督同設計清酒嘅味道）更有可能親自帶團，同大家一齊深入探討釀酒嘅奧秘，係十分難得嘅活動。酒藏開放日通常冇使預約就可以參加，但亦有一啲酒藏設有人數上限，需要提前預約。另外視乎規模，酒藏開放日亦有可能成為當地嘅祭典活動，成個市嘅居民都去慶祝，變得非常熱鬧。去之前記得做定資料搜集喇！
通常喺酒藏開放日，參觀完場地之後，都會提供多款清酒畀各位參加者試飲。有時，甚至有機會飲到直接由酒槽鮮榨嘅清酒。而活動當日，除咗可以購買到當日活動限定嘅清酒，亦會有攤位遊戲同小食檔，以及福袋抽獎等嘅豐富活動。大人固然可以滿載而歸，連唔飲得哂嘅細路都可以樂在其中。
有興趣嘅話可以留意下1月至2月嘅週末，因為此時為新酒釀成嘅季節，係舉辦酒藏開放日最密集嘅時期。東日本譬如鶴岡、長岡、諏訪；西日本如伏見、灘五郷、西条等知名同密集嘅釀酒城市或地區，經常會有幾間酒藏同時開放。而離火車站比較遠嘅，有可能會提供免費接駁巴士，方便參加者到達會場，唔使顧慮酒後駕駛嘅問題。下次去旅行睇下好唔好彩，撞唔撞得啱酒藏開放嘅日子喇！
（攝於長野縣須坂市 遠藤酒造場）
新鮮壓榨嘅清酒鮮甜無比，只有喺現場先可以品嚐得到。
（攝於長野縣須坂市 遠藤酒造場）
（攝於長野縣須坂市 遠藤酒造場）
另外有部分嘅酒藏不得入內參觀，而一啲較為大型嘅酒藏就會設有清酒資料館或博物館，畀遊客認識清酒釀造過程同品牌嘅歷史，有啲仲會設有餐廳或酒吧，可以坐低慢慢品嚐清酒。當然唔少酒藏只設有販賣部，但唯有喺酒廠先可以買到當地限定，甚至乎係該酒藏限定嘅清酒。大家可以試下詢問酒廠職員會唔會有免費提供試飲，咁就可以揀岩心儀嘅清酒畀自己或者親朋好友啦。
（攝於新潟縣長岡市 吉乃川）
參觀酒藏前有幾樣嘢係需要注意嘅。
（1）緊記前一日唔好食納豆、乳酪等發酵食物（味噌、醬油、其他酒類則冇問題）或柑橘類食品。大自然含有天然酵母，酒藏內部亦唔例外，以上食物嘅微生物菌會影響釀酒過程，所以呢一點對釀酒非常重要。
（2）另外，唔好搽香水或香味強烈嘅髮膠，因為咁會有機會轉移到酒廠，甚至清酒身上而影響味道。
（3）最後，記得遵守酒藏工作人員嘅指示，唔好偏離指定路線或觸摸非指定嘅物品，從而影響工作人員作業及自己安全。
每個縣嘅風土氣候，土壤水質都各有不同，釀出嚟清酒會各具獨特嘅味道。有啲名釀喺香港，甚至喺東京、大阪等大城市嘅酒舖都買唔到。有機會就將酒藏，加入你下次去旅行嘅行程到啦！